UD&PA Minister Pu Zodintluanga chuan nimin tlai khan Serchhip khawpui chhunga Urban Development & Poverty Alleviation Department hmalakna hmun hrang hrangte a hmunah kalin a tlawh a, hnathawh dan kalhmang te endikin, hna thawh tur atana hmachhawpte pawh a hmunah kalin uluk takin a enfiah a, hnathawktute pawh kawmin an harsatnate a ngaihthlak sak bakah hnathawh a sawt theih nana chak zawka hma lak anih theih nan ruahmannate a siam sak bawk.

UD&PA Minister hian Serchhip Field Number 2 a tlawh hmasa berin field chei hna thawh mek te a endik nghal a, Serchhip VC-III huamchhunga Community Hall sakna tur hmun tlawhin a enfiah a, hemi hnu hianSerchhip VC-I huamchhunga auditorium mi 1100 len theihna tur sak mek pawh tlawhin a satu contractor leh engineer ten an lo dawngsawng a, anni hian May 2012 ah chuan sak zawh hman an in beisei thu lo sawiin, hna chak lehzual zawka thawh anih theih nana an mamawh te Minister hnenah hian lo thlenin Minister chuan a tul dan angin rem a ruatpui nghal zel a ni.

Minister hian VC-II leh VC-IV huamchhunga Indoor Stadium sakna tur hmun a tlawh bakah New Serchhip-a Indoor Stadium sakna tur hmun leh Boxing Hall sak mek te pawh a tlawh nghal a, hna chak taka thawk turin hnathawktute chu a chah a, an intiam hun chhung ngeia hna zo turin leh a tul chuan zanah pawh thawk mai turin a hrilh bakah uluk leh belhchian dawl taka thahnemngai turin a chah tel bawk a ni.

Minister hi Pu R.Lalvena, Secretary, Sports & Youth Services Department, Pu P.Lalchhuanga, Deputy Commissioner, Serchhip District, Pu K.Lalthawmmawia, Director, UD&PA, Pu Vanlalmawia, Joint Director, UD&PA bakah official leh UD&PA Engineer thahnem takin an tawiawm a, Aizawl atangin chanchinbumi engemaw zat an tel bawk a, Serchhip chhunga VC leh tlawmngai pawl ten an lo tawiawm tha hle bawk a ni.

Minister hi Serchhipah a riak ang a, vawiin  zingah Hnahthial panin Hnahthiala Sports Stadium sakna tur hmun a tlawh ang a, hemi hnu hian zan riak lovin Aizawl lam panin a kir lehnghal ang.