Vawiin chawhnu ah khan UD&PA Minister Office ah State Level Sanctioning and Monitoring Committee(SLSMC) chuan Rajiv Awas Yojana(RAY) hnuaia mi khawsak harsa zawk te chenna in sak hna UD&PA vilna hnuaia beneficiary ten an thawhmek chhunzawm zel dan tur, UD&PA Minister Pu Zodintluanga hovin an rel.

RAY hi India sawrkar in Slum Area awm lova India ram siam a tumna programme pawimawh tak kalpui mek niin nakin lawk ah khian Sawrkar Laipui chuan Scheme thar, Housing for All 2022(Urban) – Pradan Mantri Awas Yojana(PMAY) chhungah a khung tel tawh dawn a ni.

RAY hnuaiah hian Mizoram sawrkar chuan Pilot Project Rs.1120.01 Crore, Ministry of HUPA in a pawmsak atanga pawisa a hmuh tawh hmanga thawk in Zuangtui Vengah chhungkaw khawsak harsa zual, chhungkaw 142 chenna tur in a sa mek a ni. Heng in sak tur zingah in 78 hi inmal ding a ni a, Multi-storey building 4 erawh chu chhungkaw 64 chenna tur atan a ruahman a ni. In mal ding 78, 25 Sq.metre zela lian, sak tur zingah hian in 38 sak hna kalpui mek niin heng zinga in 18 chu sak zawk tawh a ni a, in 20 te hi la sak mek a ni. In la sak belh tur 40 a la awm a, RAY hnuaia insak hna reng reng hi sawrkar in chenna-in a pek tak, beneficiary ten RAY guidelines hnuaiah an sa a ni.

SLSMC ah hian in 40 la sak tur chhunzawm a nih theih nana tihfel hmasak ngai te tarlan niin a hma lama sak zawh vek a nih theih nan ruahmanna siam a ni.