Nimin chawhnu khan UD&PA  Minister Pu Zodintluanga chuan Falkland Vengah Ministry of Housing and Urban Affairs(MoHUA) hnuaia Rajiv Awas Yojan(RAY) hmalakna kaltlanga chenna in sak a hawng a. Falkland Veng - RAY  Pilot Project hnuaia  chenna in sak te hi Building lian 5 leh building te chhawngkhat chi 5 niin a chhungah  chhungkaw 74  awm theihna tur  Dwelling unit(DU) 74  a awm ni. Chenna in bakah Community Centre, Health Centre leh Anganwadi Centre te pawh a awm a. Falkland Veng - RAY  Pilot Project  hi chhungkaw thawhchhuah nei tlem zawk(Lower Income Group) te tan, inluahman tlawm zawka luah theih tura ruahman a ni. 

Falkland Venga RAY Pilot Project hawnna huna khuallian, UD & PA Minister Pu Zodingtluanga chuan  Urban Development  & Poverty Alleviation hnuaiah sawrkar in hmasawnna liantham tak tak a siam a ti. Khawpui chhung tih hmasawnna leh khawpui chei bawl nan Urban Development hnuaiah hmuh theihin Aizawl khawpuiah leh Census Notified Town-ah te hna  pawimawh leh vantlang tana tangkai tak tak te thawh a ni a. Hetih lai hian mipuiin an hriatlar loh zawk Poverty Alleviation atangin URban Development hnuaia hmalakna aia tam zawk mah thawh tawh leh thawh mek zel a ni bawk a ni a ti. UD & PA Minister chuan UD &PA hnuaia sawrkar hmalakna atangin mi harsa zawk ten an mahni puala an in tur hmun tam takah an neih phah a, chhungkaw harsa  tak tak tam tak tan lawmna leh hmasawnna thlentu a ni mek tih a sawi.

Falkland Venga RAY Pilot Project  chu, scheme tawp tawh, UD & PA a hnathawkte inpekna  leh  remhriatna avanga puitling thei a ni a ti a.  Sum leh pai a thawhchhuah nei tlem zawk te leh a mamawhtu, khawpuia cheng mi harsate tan malsawmna in a nih ngei a beisei  tih a sawi a. Inthar a lut tur te chuan Falkland Veng khawtlang hruaitute leh khawtlang mipuite chu an vengchhung hmasawn leh zual nan theih tawp an chhuah ve zel a ngai dawn a ni a ti a. RAY Project chhunga Multipurpose Community Centre pawh a awmna hmuna chengte tan bakah vengchhung mipui leh a mamawhtu a piang te tana hman tangkai a nih theih nan enkawl hna chu Falkland Local Council hnenah sawrkarin a hlan nghal tih a sawi bawk a ni. UD & PA Minister Pu Zodintluanga,  Sports Minister ni bawk chuan Kum 20 chuang hnua India ram tana Asian Games a Silver Medal vuak chhuah puitu, Nula Lalremsiami chu Mizoramin kan chhuang a, Sawrkarin sum a pek tur zat a pek thin piah lamah Cheng Nuai 10 pek a ni dawn a, Falkland RAY Project Housing ah pawh  Chenna in, Individual Housing Unit pakhat chu a ma pualin dah a ni dawn a ni a ti 

UD & PA Minister Pu Zodingtluanga chuan   UD & PA hnuaia sawrkar hmalaknaah te hmasawnna ruhrel lian tak tak hmun tam takah din a ni tawh tih a sawi a. Kawngkawi zim tih zau, hmun pawimawh panna kawngpui dung  zau, vantlang mipui te mamawh buiding sak, Bawlhlawh sawngbawlna hmun buatsaih, hmasawnna rurel pawimawh tak tak siam leh hna pawimawh dang tam tak bakah miretheite chawikanna programme hrang hrang te, mi harsa zawkte tana eizawnga kawng kawhhmuh leh zirtirna pek bakah  miretheite tana chenna in sak sak te thleng in a huam vek a ni a ti. Tunah hian BSUP hnuaiah Durtlang, Rangvamual leh Lawipuah te mi khawsak harsa zawk, chhungkaw 1026 tan chenna in sak sak ni tawh in an luah mek a.  Edenthar Vengah pawh BSUP hnuaiah tho  mi khawsak harsa zawk, beneficiary te tan insak a ni a, sak zawh tawh niin hawn theih tep a ni tawh a ti.NULM hnuaiah miharsate te tan eizawnna kawng inkawhhmuhna kumtin kalpui a ni zel a, kum tin mi sang telin eizawnna thar an neih phah mek a ni a ti a. District khawpuiah te leh Census Notified Town - Thingtlang khaw lian deuhah te pawh mahni puala in sa thei lo sang tam tak tan  chenna in sak sak a ni tawh a. Tunah pawh  Mizoram pumpui huapin PMAY hnuaiah  mi sing nga chuang chenna in sakna turin hmalak mek a ni a ti. 

Thusawitu dang, Khualzahawm Deputy Speaker Pu R.Lalrinawma, Bialtu MLA ni bawk chuan RAY Pilot project chu a veng neitu Falkland Veng bakah Aizawl Khawpui tan hmasawnna, mi khawsak harsa zawk tan malsawmna leh vanneihna a ni a ti a. Lo awm thar te tha tak lo lawm tur leh chiauau turin khawtlang hruaitute leh a vengneitu, Falkland vengmite a chah bawk a ni. 

Falkland Venga RAY Pilot Project hawnna hun hi UD & PA Director Joseph H. Lalramsanga'n a kaihruaia; Technical Report, Pu C.Malsawma, Executive Engineer, UD & PA hnen atangin ngaihthlak a ni. Technical Report a inziah  dan chuan RAY Pilot Project, Falkland Venga mi sak nan hian RAY hmalakna hnuai atangin Rs  6.22 Crore hman a ni. Building lian zawk, Multi Rental DU Block pakhat  zel thuthmun hi Square Feet 1665 a zau a ni a, Chhungkaw pakhat chenna/ DU hi  Square Feet 340 zela zau a ni a, Building te zawk, chhawngkhat chi,Double Dwelling Unit Block pakhat zel thuthmun zau zawng hi  340 Square Feet zel a ni thung. He RAY Project-ah hian mihring chenna in bakah  Square Feet 1620 a zau Multipurpose Community Centre te, Anganwadi Centre / Health Centre , Tuihawk Luankawr leh a panna kawng te pawh siam tel a ni bawk a ni. RAY Pilot Project hawnna hunah hian Dr Ngurdingliana, MLA, Pu Lalringliana, Deputy Mayor, AMC, Official te, Falkland khawtlang hruaitute leh a vengchhung mipui te an tel tha hle a ni.