Tukin zing dar 7:00 khan Urban Development & Poverty Alleviation Minister Pu Zodintluanga hovin Vaivakawn Junction-a kawng chep lai rawt hniam a kawng zauhna tur chu a hmun ah enfiah a ni. Higher Education Minister Pu R. Romawia pawh he kawng enna ah hian telin UD & PA Minister hi a tawiawm. Kawng rawt hniam tur hi Vaivakawn atanga Seventh Day Tlang pan chhohna kawng peng leh Kanan Veng penna lai bawr vel a ni. Kawng rawt hniam a nih hun ah chuan University panna kawng pengthuam chu a zau ang a, traffic kal dan pawh tun aia chak zawk tura beisei a ni.
A hmun ah hian Minister hovin UD & PA, PWD, P&E, PHE Department-a hotulu leh Engineer-te; AMC, Secretary; Aizawl Traffic Police hotute; Vaivakawn Local Council leh Vaivakawn Branch YMA hruaitute chuan helai hmuna kawng peng hrang hrang chu thlir hovin hma lak dan tur chungchang an sawiho. Kawng an en zawh hian Minister-te, Department hotute leh veng hruaitu chu Vaivakawn Branch YMA Committee Room-ah an thukhawm leh a ni.
Pu Zodintluanga chuan helai kawng zauh hi mipui tan a tangkai dawn a, mahse a laih laiin mipui tan harsatna engemaw chen a awm dawn avangin a huphurh awm a, amaherawh chu helai veng hrang hrang hruaitute leh Department hrang hrang – PWD, PHE leh P&E leh BSNL ten nen inrawnkhawm a, thawhhona tha tak nei a, mipui tan harsatna tlem thei ang ber siam a, hna thawh tum a ni, ti. He thutkhawmnaah hian mimal ram hek tur chungchang chu Local Council leh YMA hruaituten a ram neitu te lo dawr se tiin tui pipe sawn, electric ban sawn leh telephone hrui zam ngai turte chu a Department concerned in uluk takin vil se tih rel a nih bakah leivung paihna tur chungchangah chu Joint YMA hruaitute dawr nise tih rel a ni bawk.
UD & PA Minister hian tunkar chhung hian hemi chungchang hi helai veng hrang hrang hruaitute a sawipui dawn a ni.
Helai Junction hi Aizawl khawpuia traffic junction-ah chuan a lun ber dawttu ni a sawi thin niin University panna peng pawh hi a zim hle a ni. Hemi avang hian motor lian a bik takin FCI kudam a buhfai phur truck tlan laiin chuan a chep hle thin. He kawng zauh zawh a hei hi ziaawm tura beisei a ni.
