Vawiin chawhnu dar 1 khan UD&PA Minister Pu Zodintluanga chuan Electric Veng Community Centre, Kolasib-ah a hawng.

Hawnna thuchah sawiin Minister chuan, 'Sawrkarin hmasawnna ruhrel a siam tam tak chu a siamdan that loh vang aimahin, a hmangtuten kan dimdawi loh avangin a chhe hma thin a ni' a ti. Pu Zodintluanga chuan sawrkar tan thil tih zung zung a harsa thin a, chuvangin, khawtlang tana rotling tur sawrkarin min siamsak tawh chuan a chhhiat hun nghak lova khawtlang huapa neitu chan changa enkawl kan uar thar a tul a, chu chu pipute zia pawh a ni a ti. UD&PA chuan Mizoram khawpui zawng zawng chei leh mipuite dawmkan tumin beihpui a thlak mek a, a dawngtu mipuiten sawrkar kan tawiawm thiam a tul hle zel dawn a ni, Pu Zodintluanga chuan a ti bawk.

Kolasib DC Pu Jitendar Yadav pawhin thu sawiin, 'Minister leh Department hotute duhsakna nasa tak Kolasib khawpuiin a dawn avangin lawmthu ka sawi a. Sawrkar hi tawiawm thiam ila, kan district-ah hmasawnna tluantling a thleng zel dawn a ni' a ti.

He Community Centre hi IHSDP Project hnuaia sak a ni a, Rs 28,11,110.00 senga 3.7.2013 atanga sak tan a ni a, 7.4.2014 khan sak zawh a ni. RCC niin, a chung rangva a ni a; a dung hi 72 ft niin, a vang 36 ft a ni a, a chung hi 24 ft a sang a ni.

Inkhawm hi UD&PA Director Pu Zorammuana’n a kaihruai a; Department official leh mipui thahnem takin hall hawnna inkhawm hi an hmang a ni.