Kumin Independence Day vawi 68-na lawmna chu Thuamluaia Mual, Lunglei-ah neih a ni a, Social Welfare Minister Pu P.C. Lalthanliana chu Khuallian niin hnampuanzar a pawtparh a ni.

Khuallian Pu P.C. Lalthanliana chuan Lunglei District mipuite duhsakna chibai a buk a; India ram zalenna ni champha hi ram mipuite tan dikna, beiseina nung leh hmasawnnate lantirtu ni tura a duh thu sawiin, India Hnam Pa Mahatma Gandhi leh ram hruaitu ropui tak tak dangte huaisenna leh inpumpekna hre renga, ram mipuite chu inphuarkhawm thiam zel tur an ni, a ti. Mizoram sorkar chuan mipui zawng zawngte hamthat tlanna tur hi thupui berah a nei a, hmasawnna ki-pui ber NLUP chu chak taka kalpui niin chhungkua 1,35,000 te hnenah tanpuina pek mek zel a ni, a ti a. Mizo thalaite hmakhua ngaiin sorkar chuan infiamna hmunhma leh hmanrua-ah pawh nasa takin hma a la a, Lunglei-ah Serkawn Melte ramah Cheng vaibelchhe 24.18 senga Sports Complex ‘Lena Stadium’ sak mek a ni, a ti bawk. Lunglei Convention Centre Cheng vaibelchhe 18.77 hmanga sak mek chu kum 2015-a zawh hman tum a nih thu te; Lunglei Shopping Complex Cheng vaibelchhe 25 hmanga sak tur pawh chak taka hmalak a ni thu leh Lunglei Topwn Area Development Scheme hnuaiah Cheng vaibelchhe 13 hmangin kawng tam taka khawpui chhung aawh hnathawh mek a ni tih a tarlang. Social Welfare Department hnuaiah Tribal Girls’ Hostel hmun hrang hrangah sak ek a ni a; mirethei zawkte tan a thlawna Residential School (EKLAVYA) pawh Serchhip-ah sak mek niin nakkum 2015-ah zawh hman beisei a ni, a ti. Horticulture Department chuan Mizoram kuthnathawktu ten an thawhrah an seng theih ngeina turin theihtawp a chhuah zel a; Central Scheme ‘Horticulture Mission for North East State & Himalayan State’ (HMNEH) kaltlangin ruahmanna hrang hrang a kalpui mek bawk a, Lunglei District-ah ‘Centre of Excellence’ din nan Haulawng leh Mualthuam‘N’ Village Council ten a hmun atan ram an pe tawh a, hemi atan Sorkar Laipui atangin Cheng Vaibelchhe 10 hmuh a ni tawh bawk tih a tarlang a ni. Local Administration Department hnuaiah mipui tana hahchawlhna leh intihhlina hmun engemawzat pei a ni tawh a; thingtlang khaw tam takah solar energy hmanga street light pek tum a ni bawk, a ti.

Khuallian Pu P.C. Lalthanliana chuan a thusawi zelnaah Mizoram sorkar hmalakna hrang hrang a tarlang a. Ram mipuite himna leh Dan hnuaia thlamuang leh hlim taka an lenza theih nan Police-te chu theihtawpa thuam mek an nih thu te, state chhunga inkalpawhna kawng tha neih theih nan chak takin hmalak a nih mek thu te; Lunglei Greater Water Supply Scheme Phase-II atan Mat Lui hman theih turin sorkarin ruahmanna a siam mek thu te; Kawlphetha-a intodelh nan heng hydel project - Tlawva, Tuirizia, Tui Ching, Kawlbe leh Tuirial - te pawh chak takin kalpui mek a nih thu leh Zirna lam tihhmasawn nan District 6-ah ‘District Resource Centre’-te chu DIET-ah hlankai turin ruahmanna kalpui mek a ni, a ti. Hriselna lamah National Rural Health Mission hman tangkaiin nasa takin tanlak mek zel a ni a, Falkawn-ah Medical College leh Thenzawl-ah AYUSH Hospital din nan bul tan thuai beisei a ni, a ti. Sorkar Laipui chuan Lawngtlai District hmasawnna atan Rs.21.64 crores leh Mamit District atan Rs.24.30 crores Project a ruahman a; W.Phaileng, Lawngtlai leh Chawngte R.D.Block atan Rs.10 crores theuh a ruahman bawk a. IT hnuaiah Public Delivery Centre 436 siam a ni tawh a, office-a kal kher lovin thingtlang hmun kilkhawr zawk atang pawha a tul leh mamawh Certificate angte lak theih tura ruahman a nih thu leh Myanmar nena insumdawn tawnna turin Lawngtlai-ah Trade Facilitation Centre bakah Farkawn,Vaphai leh Sangau-ah Centre tur sak mek a nih thu a sawi a. Ram leilung hausakna haichhuahna kawngah Mizoram Chief Minister hmalakna-in Oil Company hrang hrang ten Maubuang, Keifang leh Thenzawl-ah te ‘drilling’ hna an thawk mek a ni, a ti.

Thuamluaia Mual-a inkhawm zawh veleh Khuallian chuan YMA Sub-Hqrs. Conference Hall-a Lunglei Photographers’ Association (LPA)-in Independence Day 2014 puala ‘Photo Exhibition’ an buatsaih chu a hawng nghal a. Hawnna inkhawm LPA President Pu Lalhmingmuana Chhakchhuak kaihhruaiah Minister Pu PC Lalthanliana chuan Mizoten thlalak hlutna chang kan hre zel chu a lawmawm hle a, ram hmasawnna pholangtu pawimawh tak a tling a ni tiin LPA-te kal zelnaah duhsakna a hlan a ni. Independence Day 2014 lawm nana sawm bikte tan Lunglei Circuit House-ah thingpui ruai ‘At Home’ buatsaih chu Khuallian hian a hmanpui bawk a ni.

Independence Day 2014 lawmna Parade-ah Armed Contingent 3, Unarmed Contingent 1, School Contingent 16 leh Band Party 3 an tel a, Parade-a lawmman late chu a hnuaia mi ang hi an ni :-

1) Armed Contingent : 1st - MRHG, Lunglei 2nd - 162 Bn. BSF

2) Unarmed Contingent : Govt. High School NCC, Lunglei

3). School Contingent :

1st - BHSS Serkawn,

2nd - Govt. H/S

3rd - 2nd Bn. MAP English Medium School

4) Band Parties : 28 Assam Rifles, 2nd Bn. MAP leh Govt. H/S Lunglei Pipe Band

Independence Day 2014 lawmnaah hian 28 Assam Rifles Pipe Band-in ‘band display’ neiin mipuiten an hlut a ni.

Independence Day 2014 lawm nana Sports discipline hrang hranga inelna neihah a hnuaia mi te hi lawmman lain vawiin khan Khuallian-in lawmman a hlan a ni :

CARROM BOARD :

Singles Champion - V.Lalmuanzova, Bazar Veng

Runners-Up - KVL Muanpuia, Bazar Veng

Doubles Champion - V.Lalmuanzova, Bazar Veng & PC Lalthlamuana, Bazar Veng

Runners-up - KVL Muanpuia, Bazar Veng & PC Vanlalkima, College Veng

SNOOKER :

Champion - K.Lalhmingliana, Venglai

Runners-up - Johnny Malsawmliana, Ramthar

9 BALLS : Champion - Lalhnehzuala, Lunglawn

Runners-up - K.Lalhmingliana, Venglai

8 BALLS : Champion - K.Lalhmingliana,Venglai

Runners-up - Lalrinsanga Chhangte, Zotlang

VOLLEYBALL (WOMEN’S)

Champion - Electirc Veng Volleyball Club

Runners-up - Zohnuai Volleyball Club

VOLLEYBALL (MEN’S)

Champion - Lunglawn Volleyball Club

Runners-up - Bazar Veng Volleyball Club te an ni.

Vawiin chawhnu vek khan Independence Day 2014 Football Tournament Final Match Thuamluaia Mual-ah khelh a ni a, Khuallian Social Welfare Minister Pu P.C. Lalthanliana chuan lawmman a sem nghal a ni.