4898/2024-2025
29th March, 2025 : Central YMA, Aizawl Municipal Corporation leh UD&PA Department te thawhhona hnuaia March 31, 2025, Thawhtanni hian Aizawl khawpui ‘Faina HNATLANGPUI’ koh a ni a. He mi ni hian veng hrang hrangah, Branch YMA leh Local Council te kaihhruainain mahni veng chhung theuh te tih fai hnatlang lo nei turin veng tin te beisei leh ngen an ni a. Heng bakah hian Aizawl khawpui chhunga hmun bawlhhlawh zual thlan bik te thian fai turin mi thahnemngai leh tlawmngai te an thawk chhuak bawk ang.
He Faina HNATLANGPUI hawnna inkhawm hi Sikulpuikawnah zing dar 10-ah hman tur a ni a. Hetah hian UD&PA Minister leh department hotute, AMC Mayor leh official pawimawh te bakah CYMA hruaitute leh a bul hnai YMA branch aiawh te an tel ang.
CYMA, UD&PA leh AMC te tangkawp chuan kum 2025 – 26 chhung atan Aizawl khawpui faina kawnga chak zawka hmalak a nih theih nan thawhhona thuthlung an siam a. Chumi hnuaia hmachhawp hrang hrang te zingah Faina HNATLANGPUI hi a hmahruaina a ni a. Thawhdunna kal zelah YMA Branch Fai Inelna neih tur a ni bawk a, HNATLANGPUI hawnna inkhawmah hian YMA Branch Fai Inelna 2025 chu khuhhawnna neih a ni dawn a ni.
He Faina HNATLANGPUI-ah hian veng tin te thahnemngai taka mahni hmun theuhah lo hnatlang turin ngen kan ni a. Mahni venga rokhawlhna eng emaw avanga hnatlang huaihawt thei lo te pawh a remchan ang anga mahni in leh a vel tih faina hun atan lo hmang tur leh, mahni veng kher lo, a remchanna hmun hmuna lo thawk chhuak turin Coordination Committee hian a ngen a ni.
