4899/2024-2025

Champhai, 29th March 2025: Zan khat riaka Champhai tlawhtu Sports & Youth Services Minister Pu Lalnghinglova Hmar chuan vawiin chawhnu khan Vanlallawma Indoor Stadium (VANIS) leh Keilungliah tuikhuah a tlawh a. A department chan dang Excise & Narcotics Department thawktute nen an inkawm bawk a ni.

Vanlallawma Indoor Stadium-a tlawhnaah hian Pu Lalnghinglova Hmar hi District Sports & Youth Office a thawktute leh Champhai District Basketball Association hruaitu ten an lo dawngsawng a. Champhai khawpuiin Mizoram Super League (MSL) a thlen ṭum a Basketball Backboard chhia chu a rang lama thlak sak tum a nih thu a sawi a ni.

Pu Lalnghinglova Hmar hian Keilungliah tuikhuah tlawhin, khualzinmite hip theihna tur a hmun ṭha leh khawtual mi te tan pawha eizawnna tling siam thei ni a hriat thu a sawi a. He hmun chei tura hmalakna pawh thui tak kalpui tawh niin, hna tan theih hun pawh hla lutuk tawh lo tura a beisei thu a sawi bawk.

Excise & Narcotics Minister ni bawk Pu Lalnghinglova Hmar hian vawiin vek khan Champhaia Excise hotute pawh a kawm a. Assistant Commissioner Pu C. Thangchuanga leh O/C Pu Lalhmingthanga te nen Champhaia Excise & Narcotics Department mamawh leh hmalak dan turte sawiin inkawmna hun ṭha tak an nei a ni.