4900/2024-2025

Aizawl, 31.03.2025: Vawiin chawhma dar 10 khan Central YMA, Aizawl Municipal Corporation leh UD&PA Department te thawhhona a Aizawl khawpui “Faina Hnatlangpui” chu UD&PA Minister Pu K. Sapdanga chuan Sikulpuikawnah a hawng a. Hemi rual hian YMA Branch Fai Inelna 2025 a khuhhawng  bawk. Minister hian CYMA hruaitute hnenah bawlhhlawh bawm lian 300 a hlan nghal a ni.

CYMA, UD&PA leh AMC te tangkawp chuan kum 2025 – 26 chhung atan Aizawl khawpui faina kawnga chak zawka hmalak a nih theih nan thawhhona thuthlung an siam a. Chumi hnuaia hmachhawp hrang hrang te zingah Faina Hnatlangpui hi a hmahruaina a ni a. Thawhdunna kal zela YMA Branch Fai Inelna neih turah hian branch hrang hrangte kum khat chhung an inel dawn a ni.

Minister Pu K. Sapdanga chuan fai tur chuan fai duhna kan thinlungah kan put hmasak a ngai a ti a. Aizawl khawpui faina tura Mizoram Sorkar in ngaihtuahna nasa tak sengin hmalakna leh hmachhawp hrang hrang te a nei mek thu a sawi a. Chung zinga pawimawh tak pakhat chu ‘Comprehensive Plan For Municipal Waste Management in Aizawl’ a nih thu sawiin, he Plan hi dt. 4.7.2024 khan UD&PA, AMC leh Aizawl Smart City Ltd. hotu ten lungrual taka pawm tlangin hming an sign hnan a. He Comprehensive plan ah hian Aizawl Khawpui faina tura ruahmanna leh hmachhawp hrang hrang tarlan ni in, hmalakna tura mawhphur tur awm te pawh tarlan tel zel a ni a. Heng ruahmanna te tihlawhtling tur hian UD&PA Secretary kaihhruaina in Monitoring Committee siam a ni a. Anni hian chak takin hma an la chhunzawm reng a, vawina hnatlangpui neih theihna pawh hi he committee leh CYMA te inbiakremna rah a nih thu a sawi.

Minister chuan Aizawl khawpui faina leh thianghlimna atana pawimawh em em, hriselna atan pawh a nghawng thui tak nei thei tur damdawiin leh a kaihhnawih bawlhhlawh sawngbawlna  changtlung tak “Common Biomedical Waste Treatment Facility” Tuirial ami chu Aizawl Smart City Ltd. in a sak hna a zawh tawh thu leh thla thar April ni 1 atang hian a takin hna a thawk tan tawh tur thu a sawi a. Mizoram a la awm ngailo ani a, tunah chuan Biomedical Waste Management Rules 2016 in a phut ang ngeia damdawi in leh a kaihnawih bawlhhlawh kan sawngbawl thei tur chu phurawm a ti a ni.

Heng bakah hian in sakna leh a thiahna bawlhhlawh thehthang leh sawngbawl hi dan leh hrai hran nei ve bawk ani a. Tunah hian Hualngohmun ah Construction & Demolition Waste Management Rules 2016 in a phut angin heng insak leh thiahna bungraw hlui leh bawlhhlawh te sawngbawlna tur bik hi sak mek a peihfel tep tawh a nih thu UD&PA Minister chuan a sawi.

Minister Pu K. Sapdanga chuan Aizawl Smart City Ltd. kaltlang in a bika siam danglam bawlhhlawh tawihthei phur motor 20 lei a nih thu a sawi bawk a. Heng motor te hi Aizawl Venglai leh Ramhlun South ah te July leh August thla, 2024 khan hlawhtling taka enchhin a nih thu te, Lirthei 20 te hi AMC ah hlan niin  tangkai taka hman anih theih nan hmalak mek a nih thu a sawi a. Hei hian bawlhhlawh thliar kawngah leh bawlhhlawh tawihthei sawngbawlna ah hmasawnna a thlen ngei a beisei thu a sawi. Bawlhhlawh tawihtheilo sawngbawlna tur bik “75 Ton per Day Material Recovery Facility ( MRF)” chu Aizawl Smart City Ltd. in Industrial Growth Centre, Luangmual ah a siam mek thu sawi bawkin Minister chuan  Company thiam leh experience nei tha tak rawih a nih thu leh he project atan hian Aizawl Smart City Ltd, AMC leh Contractor ten inremna thuthlung ziak in, chu inremna ang chuan contractor hian a siam hna a thawh zawh ah kum 10 chhung he project hi a enkawl chhunzawm dawn a ni a ti a. He project hi April 2026 a thawh zawh hman tum a nih thu leh, a hlawhtlin hun chuan khawl changkang zawk hmangin tunlai thiamna leh remhriatna nen bawlhhlawh tawihtheilo zawng zawng felfai taka sawngbawl tum a nih thu a sawi. Hei hian bawlhhlawh sawngbawl leh a kaihhnawih ah hian mi engemawzat tan eizawnna a in hawn phah beisei a ni bawk.

Vawiin Faina Hapta hawnna inkhawm ah hian Aizawl Deputy Mayor Pu R. Thanglura chuan thu sawi bawkin, Faina hnatlangpui chuan mitin zingah Aizawl khawpui hi kan ta a ni tih lo chiang nawn leh se, khawlai leh kawlai te chu a bawlhhlawh phallo in, faina vawnghim reng tura inhrilhhriatna tha tak a nih a beisei thu a sawi a. AMC in khawpui faina atana hma a lak dan hrang hrang sawiin, chhungkua theuhin mahni bawlhhlawh te paih hmaa a nih dan tur taka uluk taka kan thliar hmasak chu apawimawh thu a sawi bawk.

CYMA President Pu Lalhmachhuana pawhin thu sawiin, Faina hnatlangpui hi ni khat atan chuah nilo, faina daihrei tur atana rilru siamna ni se a ti a. Faina kawngah Aizawl khawpui chuan hma a sawnna tur a tam takzet thu a sawi a. YMA in ram tana thil tha turah chuan theih tawp chhuaha ke a pen zel tur thu a sawi bawk.

Vawiin inkhawm h Prof. Lalnuntluanga, Central YMA Vice-President chuan a kaihruai a. UD&PA bakah AMC leh YMA aiawh hrang hrangte an tel a ni. Vawiin hian Aizawl khawpui chhungah YMA branch te leh Local Council te tangkawpin fai hnatlang neih a ni.