4737/2025-2026

Dated Aizawl, the 9th March, 2026: Urban Development & Poverty Alleviation (UD&PA) Department buatsaih ‘Sikul Bungraw Inthleng Runpui – Swap and Save Campaign’ chu vawiin khan Sanitation Site Office, Tuikualah Pu Lalmalsawma Pachuau, Commissioner and Secretary, UD&PA chuan khuallian niin Aizawl leh District hrang hranga hlawk taka mi hrang hrangin an hman theih nan a hawng.

Khuallian Pu Lalmalsawma Pachuau chuan Swap and Save Campaign buatsaih a ni chu tha a tih thu sawiin, a ngaihtuahchhuaktute chungah leh a hlawhtlin nana Department mite thawhhonaah lawmthu a sawi a. UD&PA Department hnathawh hrang hrang karah Swap and Save chu Urban Development leh Poverty Alleviation intawhna tak niin, faina lama hmasawnna pakhat, mi rethei zawkte’n an chhawr theih tur niin a sawi a. Mipuite’n awlsam taka thil tha kan tih theih tur Department-in a chhawp chhuak chu a lawmawm hle niin a sawi.

UD&PA Commissioner & Secretary chuan nikuma a vawi khatna atana Swap and Save Campaign an kalpui chu a hlawhtling hle tih sawiin, kuminah pawh a thehlar lama tan lakpui turin media lam leh Department mite a sawm a. Nikuma bungraw lut zat let vel target-a neih a, District lam nen pawh thawhhona tha zawk neih a pawimawh thu a sawi a. A mamawhtute’n bungrua an lam theihna tur, hmun hrang hranga 3R Centre-te leh a buaipui tur self-help group-te UD&PA hnuaia an lo awm sa chu lawmawm a tih thu sawiin, department hmalakna tikimtu leh tichaktu an ni thei dawn a ni, a ti.

Hawnna hun hi Pu Jacob Lalawmpuia, Director, UD&PA Department-in kaihruaiin, Pi C. Lalduhzuali, Joint Director (Admin), UD&PA Department chuan technical report a pe a ni.

Nikum khan Swap and Save Campaign hi Aizawl veng pasarih (7) leh District headquarters tinah neih niin, mipuiin an hlut hle a. Nikuma campaign neih chhunga bungraw lut zawng zawng chu 20,386 niin, chhuak zat 12,596 a ni.

March ni 9 – 21, 2026 chhungin he campaign hi kalpui a ni ang a. Centre hi Aizawl khawpuia veng pariat (8)-ah leh district headquarters tinah hawn a ni. He Centre hi zirlai naupang session thar kai mai turte’n an zirlaibu hman tawh loh, uniform hak tawh loh te leh zirlai kaihhnawih (school items) an rawn donate theih nan leh, a la hmang tangkai turte’n an hman nawn ve leh theih nana awlsam zawk leh a thlawna an lak theihna tur hmun a ni.

3R Centre awmna hmun te:-
Govt. Multiutility Centre, Thakthing
AMC Plaza, Bawngkawn
Sanitation Site Office, Near Solomon’s Cave, Tuikual
Dawrpui Middle School, Dawrpui
Local Council House, Vaivakawn
Local Council House, Durtlang North
Local Council House, ITI
Community Hall, Armed Veng South

Sikul Bungraw Inthleng Runpui hi mipuite’n an hlut hle a, sikul bungraw hluihlawn tawh, bawlhhlawh chang mai turin a hmang tangkai turte hnen a thlen theihna tur kawng tha tak niin, bawlhhlawh tihtlem kawngah pawh hmasawnna tha tak a ni.