Vawiin 14th December, 2017 khan UD&PA Minister office chamber-ah Department hrang hrang: UD&PA, PWD, P&E, PHE, Traffic Police leh AMC lam hotute nen Aizawl khawpui chhunga pengthuam hrang hrangte chu siamthat leh tihzauh theih a nih theih dan tur an thlirho a. Aizawl chhim lam Chaltlanng-Eden Thar-Bawngkawn pengthuam, motor intawh tamna lai chu a kawng rawt hniam a, zau zawka motor insulpelhtir theih dan tur an thlirho a ni. Minister chuan hemi atan hian ruahmanna thui tak kalpui a nih tawh thu leh PWD lam hotute pawhin plan leh drawing an ruahman tawh a, hei hi kan tih theih chuan Aizawl chhim lama mihring leh motor intawhkhawm tamna chu nasa takin a tihziaawm an beisei thu an sawi a ni. Chaltlang-Eden Thar-Bawngkawng pengthuam bakah hian Khatla kawn siam danglam te, Dawrpui Vengthar to Dinthar chhuk thlakna leh kualna peng tihthat chungchang te, Vaivakawn to Hunthar pengthuam siamthat te leh Aizawl khawpui hmun hrang hrang siamthat theih tur awmte an sawiho a ni.

Pengthuam siamthat tur hmun hrang hrang bakah hian Aizawl khawpui chhung hmun hrang hranga road direction sinage siam tur ruahmanna pawh thlirho nghal a ni. Road sinage hi khawpuia mikhual zinte tan kawng inkawhhmuhna remchang tak mai a nih bakah khawpui a cheimawi hle a, India ram leh khawvela khawpui changkang zawkte pawhina an tih thin a ni.

Vawiina UD&PA Minister hova meeting chuan Aizawl khapwui chhunga pengthuam siamthatna tur ruahmanna hrang hrangte hi kum thar veleha thawh tan a nih nghal theih nan Department hrang hrangten an ruahmanna neih tawhte siamthat leh ennawn ngai awmte chu siamthain 20th December, 2017 hmain Director, UD&PA-ah thehluh ni se tiin an rel bawk a ni. Pengthuam siamthat tura ruahmante hi kum thar veleh thawh tan theih turin inbuatsaih ni se tiin vawiina meeting chuan an rel a ni.

Aizawl khawpui chhunga pengthuam siamthat hi UD&PA bultumin Department hrang hrangte thawkhovin kalpui tawh thin a ni a, Vaivakawn junction leh Pangi Peng te pawh siamthat a lo ni tawh thin a ni.