Vaivakawn-Kanan-Seventh Day Tlang kawng peng thuam lai kawngpui tawt thin lutuk sutkian nan kawngpui rawt hniam chungchang sawihovin vawiin chawhnu khan UD&PA Minister Pu Zodintluanga hovin Secretariat Conference Hall ah sorkar department kaihhnawih officer te leh helai kawngpui hmangtu veng hrang hrang khawtlang hruaitute an thukhawm.

Minister Pu Zodintluanga chuan Aizawl khawpui tlaklam mipui ten Vaivakawn kawngpui tawt lutuk avanga harsatna nasa tak an tawh dan te Sorkar chuan hriain chumi sutkian nana helai kawngpui rawthniam a ruahman dan te a sawifiah a. Mipui hamthatna tura hmalakna chuan hun engemaw chen harsatna a thlen dawn avangin mipui leh khawtlang hruaitute hriatthiamna leh tawiawmna a ngen a ni. Ruahman dan chuan tun Inrinni (ni 15.11.2014) tlai dar 6:00 ah hian hna thawh tan tum a ni a, zan tlaivara chhunzawm pata thawk chhovin kar khat vel chhung chuan kawng rawt hniama alkatra luan fel leh hman beisei a ni. He kawng siam chhung hian inkalpawhna te, tui pipe line leh BSNL Broadband hrui te siamthat a tul dawn avangin hun engemaw chen a khaihlak dawn a, kawngpui zau leh nuam zawk, mipui tana chhawrnahawm tak siamna turah mipui ten sorkar hmalakna lo hriatthiampui turin Minister chuan a sawm bawk a ni. Minister chuan he kawngpui siamthatna tur hian UD&PA Department ah sum pawh ruahman fel vek a nih tawh thu a tarlang bawk. He kawngpui siamthat hna thawh chhung hian buhfai leh kawlphetha lamah chuan harsatna a thlen loh beisei a ni bawk a ni.

Vawiina meeting ah hian Minister hi Pu R.Lalvena, IAS, Secretary, Food, Civil Supplies & Consumer Affairs, Pu Zorammuana, Director, UD&PA leh PWD leh PHE officer ten an tawiawm a, veng hrang hrang khawtlang hruaitu kalkhawm te chuan an hriatchian loh lai te zawtfiahin an inhrilhfiah a, vantlang mipui hamthatna tura Sorkar hmalakna chu tha tiin lawmthu an sawi bawk a ni.