All Mizoram Farmers’ Union (AMFU) din champha vawi 20-na (20th AMFU Rising Day) lawmna vawiina Vanapa Hall-a buatsaihah Chief Minister Pu Lal Thanhawla chu khuallian niin a hmanpui.

Chief Minister chuan AMFU in kum 20 hmel a hmu ta chu a lawmpui thu a sawi a . Sorkarin kuthnathawktu, loneimi leh mirethei zawkte retheihna atanga chhanchhuah a tumna kawnga a hmanrua atana NLUP a kalpuinaah AMFU in sorkar a tawiawm thin chu lawmthu a sawi bawk a. AMFU a kuthnathawktu kalkhawmte thawhhona leh insuihkhawmnate chu chhuanawm a tihthu leh tha a tihzia thu Pu Hawla chuan a sawi a. Kuthnathawh hi hna zahawm leh ropui a nihzia a naupanlai leh puitling anih thlenga a pa atanga a hriatchian thu a sawi a. Kuthnathawktute tel lovin ram ropui ber pawh a kal theilo a ni a ti a. Kuthnathawhah engmah zah tur a awm lohzia sawiin, chutiang mite zinga a tel chu a lawm hle a ni a ti.

Chief Minister chuan eng hna pawh thawk ila Pathianin a rawngbawl tura min dahna a ni a, tui taka thawk mai tur kan ni tiin, taimakna, rinawmna, dikna leh Pathian tihna nung nen kan thawk tur a ni a ti. Kuttling lova sum lak pawisak lohna te, sorkar sum eiruk duhna rilru leh Pathian leh sorkar duh loh zawnga awmte hi kan bansan a hun tawh tak meuh a ni a ti a. A chhelai siam thatu tur vek kan ni a, ram leilung fate kan nih angin leh ringtu kan nih ang pawhin Pathianin ram min pek hi a duhdana cheibawl hi kan tih tur a ni a ti. Pu Hawla chuan sum ngainatna avangin hmasawnna project lian kan neih te a thuanawp phah a ni tiin, Sairanga rel lo lut tawh tur leh chhim lama Myanmar rama lawng chawlhhmun, Sittwe kaltlanga Bay of Bengala chhuahka kan neihna tura Lawngtlai atanga motor kawngpui siam mekahte diklo taka compensation kan beisei avangin hna in nasa takin a tawrh phah a, a thuanawp phah mai ang tih a hlauhawm hle a ni a ti.

Pu Hawla chuan sorkarin mipui, loneimi kuthnathawktute tana hna a thawhnaah remchanna a siam sak mai (facilitate) chauh thin a ni a ti a, a taka kalpuitu leh a tihlawhtlingtu chu mipuite an ni a ti a. Chuvangin sorkar leh mipuite chu inlawmtawna kal tur kan ni a ti. Kuthnathawktu AMFU memberte chu mi taima intelkhawm, kawng dik leh tha kawhhmuhtu awmnaah phei chuan mi chhuanawm tak tak vek an ni a ti a. Hun lokal zel turah thawhhona tha zawk a awm chhoh zel chu a duhthusam leh a beisei a ni a ti.

Chief Minister hian AMFU in nakum 2015 atanga Mizoramah Green Revolution kalpui a tumnaa policy a duanna lehkhabu a tlangzarh bawk a ni.

AMFU President Pu Joseph H.Thanzuala chuan Mizorama Green Revolution Movement kalpui a tum dan chipchiar takin a sawi a. Kum 2015 - 16 chu AMFU in buh thar tam kumah a puan thu a tarlang bawk a ni.

AMFU hi kum 1994 November ni 12 khan Cooperative Hall, Babutlang ah mi 74 kalkhawm tena an din a ni a. Hmarchhak State 6 zinga North East Farmers’ Federation an dinah a inthlunglut ve a. Kum 20 an kal chhung hian President 4 a nei tawh tih inkhawmah tarlan a ni a. Vawiina inkhawmah hian Mizoram district hrang hrang atangin palai thahnemtak an kal a ni.

Inkhawm hi Prof.H.Lalramnghinglova, Senior Vice President in a kaihruai a ni.