737/2025-2026. Dated Aizawl, the 5th June, 2025: Pu K. Sapdanga, Urban Development & Poverty Alleviation (UD&PA) Minister chuan vawiin khan Ministry of Housing and Urban Affairs (MoHUA) ruahman angin, World Environment Day denchhena AMRUT Mitra (AMRUT leh DAY NULM tangkawp) hnuaia Thingphun Runpui: ‘Women for Trees’ campaign hawnna hun, BSUP Complex, Lawipu-a neihah khuallian niin a hawng a. He hunah hian Pu Lalmalsawma Pachuau, UD&PA Secretary chu khual zahawm a ni.
Khuallian Pu K. Sapdanga chuan he thingphun beihpui thlakna hawnna hunah hian thing phun mai piah lamah thing phun sa chawm nun a pawimawhzia sawiin, sawrkar laipuiin thing phun tam kawnga hma hruai tura a ruat, hmeichhe Self-Help Group (SHG)-te chu he hna thawk tur hian an chak tawk tih a sawi a. Minister chuan khawvel boruak chhiain a ken tel, khuarel chhiatna tam tak lakah thing phun hmangin kan inveng thei a ni, a ti a. SHG-te chu ram pumpui eizawnna bultanna atan an pawimawh thu sawiin, hlawhtlinna atan hausak aiin ngelngheh a pawimawh zawk thu a chah a ni.
He hunah hi Pu Jacob Lalawmpuia, UD&PA Director chuan hruaiin, kalkhawmte lawmna thu a sawi a. Pu Andrew Lalhruaia, UD&PA Joint Director (Plan) chuan sawrkar laipuiin he campaign a duan dan leh department hmalakna leh hmachhawpte a sawi a. Khual zahawm, Pu Lalmalsawma Pachuau chuan SHG member thlanchhuah 27-te hnenah thingphunna tura an mamawhte a sem a. He hunah hian SHG member-te bakah UD&PA department-a thawkte an kal khawm a. He thing phun beihpui thlakna hawnna hun tawi zawhah hian khuallian leh khual zawhawmte leh department hruaituten BSUP, Lawipu-ah hian thing an phun a ni.
He Thingphun Runpui: ‘Women for Trees’ campaign thupui chu ‘Ek Ped Maa Ke Naam’ a ni a, a awmzia chu ‘Nu Hmingin Thingphun Pakhat’ tihna a ni a. UD&PA Department-in a ruahman dan chuan he ‘Women for Trees’ programme-ah hian SHG 112 atangin member 517-ten thingtiak 1149 an phun dawn a. Phase-I hnuaiah thingphunna hmun tur thlan fel tawh niin, Mizoram-ah chuan khawpui 10-ah, hmun 46-ah phun tum a ni a. Aizawl bikah chuan BSUP Complex pathum (Lawipu, Edenthar leh Durtlang) bakah RAY Complex, Falkland-ah thing hi phun tura ruahman niin, Phase-II chu vawiina bultan tak, a taka thingphun tan a ni a, ruahman ang chuan August thla thleng a awh dawn a. Phase-III hnuaiah chuan SHG member-ten thingphun hi an enkawl chhunzawm dawn a ni.
