736/2025-2026

Khawzawl, dated 5th June 2025: Vawiin khan District Education Office-ah World Environment Day pualin Ek Ped Maa ke Naam 2.0 hawnna hun hman a ni a, Khawzawl Bawrhsap Pu K. Vanlalthiana'n khuallian niin hun a hmanpui.

Khuallian Pu K. Vanlalthiana chuan thu sawiin vawiin World Environment Day a he hmalakna pawimawh tak, thingpun uar tura naupang fuihna hun an hmang thei hi lawmawm a tih thu a sawi a, ramngaw humhalh nan leh ram chhanhim nan thing phun hi ngai pawimawh zel turin kalkhawm te a fuih a ni.

He hun hi DEO Office a HA Pu Lalhumhima'n a kaihruai a, Ek Ped Maa ke Naam 2.0 chungchang presentation PHED SDO Er. Freddy Vanlalmuanawm'n a pe bawk a ni. Khuallian Pu K. Vanlalthiana chuan DEO Office hnungah thing a phun nghal a, naupang leh nu pahnihin thing pahnih ve ve a bulah an phun nghal bawk a ni.

Ek Ped Maa ke Naam 2.0 hi nu te hmangaihna leh zahna lan tir nana thing phun tura infuihna a ni a, June ni 5 atanga September ni 30 thleng kalpui a ni ang.