735/2025-2026
Saitual, the 5th June, 2025: Vawiin khan Rulchawm Urban Park, Saitual District-ah World Environment Day denchhenin nu te hminga thingphun "Ek Ped Maa Kaa Naam” Plantation Drive neih a ni a, he hunah hian District Bawrhsap Dr. Lalngura Tlau chu khuallian niin hun a hmanpui a, khuallian leh Self Help Group-a nuho ten thing an phun nghal a ni.
He hunah hian District Bawrhsap Dr. Lalngura Tlau chuan thu a sawi a, UD & PA department hmalakna chu fakawm a tih thu sawiin, khawtlang tana chhenfakawm programme an duang chu lawmawm a tih thu a sawi. Bawrhsap chuan nu te hminga thingphun tur a nih angin, nu te mitthla chung leh rilrua hre reng chunga phun theuh turin kalkhawmte chu a chah a. Thingphun chu a pawimawh rualin, chawm puitlin a, enkawl leh humhalh chhunzawm chu a pawimawhin a tul hle a ni, tih a sawi bawk. SHG te chu an thing phunte enkawl chhunzawmna kawngah theih tawp chhuah zel turin Bawrhsap chuan a chah nghal a ni.
UD&PA Department hnuaia Scheme kalpui mek AMRUT Mitra World Environment Day denchhenin nu te hming puala thingphun "Ek Ped Maa Kaa Naam” Plantation Drive kalpui a ni a. He Campaign hi June ni 5, 2024 khan Prime Minister Narendra Modi-an a lo tlangzarh (launch) tawh a ni.
He hmalaknain a tum ber chu sik leh sa danglam chak tak avanga khawlum leh ni sa vawng dai tura khawpuia thingphun leh ramngaw humhalha siam thar a ni. Hemi chhunzawm nan hian AMRUT Mitra hnuaiah NULM Scheme te nen tangkawpin he campaign hi neih chhunzawm tura tih a ni a, kuminah hian Women for Trees Campaign tih a nih angin, UD&PA Department hnuaia Self Help Group nuho te hmalakna tur duan a ni.
Women for trees campaign thawhkhatna chu May ni 21-23, 2025 khan SHG te nen Orientation Session/Capacity Building programme neiin thingphunna tur hmuna thlan Rulchawma Govt. High School area leh Keifang Playground bulte enpuiin a tih dan turte inhrilh hriat a ni a, thing hi 20 ve ve phun tura ruahman niin, Herhse leh Tlaizawng hi Forest department atangin lak a ni.
He Campaign thawhhnihna atan vawin June ni 5, 2025 World Environment Day denchhenin thingphun hi kalpui a ni a, Rulchawm Urban Park-ah Er. Laldinsanga Hnamte, DUDO, UD& PA kaihruainain he programme hi hman a ni. Heng thingphun hna thawk tur hian Rulchawm area atangin SHG 2 leh Keifang area atngin SHG 2 ruat niin, member 12 ve ve an tel a, an mamawh tur hmanraw hrang hrang (field kit) chu sem nghal an ni. SHG member te hian kum 2 chhungin an thingphunte hi an enkawl chunzawm ang a, a chhiat that bakah a nun that leh that loh thlengin a mawh an la dawn a ni. Thingphunna hmun tura thlan pakhat zawk Keifang Playground area-ah hian Green Mizoram Day June ni 11, 2025-a lo thleng tur denchhenin phun leh a ni ang.
