Vawiin khan UD&PA buatsaih ‘Consultation Workshop on Waste Management’ chu Aizawl Club-ah hman a ni a, UD & PA Minister Pu Zodintluanga chu khuallian niin, Solid Waste Management Rules, 2016 zirho na hun hman a ni.

Minister Pu Zodintluanga chuan mihring khawsak phung tehna pawimawh tak pakhat chu faina kawngah a innghat a, chuvangin kan changkanna tehfung chu kan khawsak phung leh kan khawlai dinhmun atangin a hriat theih a ni, a ti. Mizoram hian kum 1977 atang daih tawh khan kum tinin Faina Hapta kan hmang thin a, sawrkar mai bakah Kohhran leh khawtlang nena tangrualin, pheikhai rual taka kan fai theih nan ke pen a lo nih tawh thin, tiin a sawi. UD&PA Department hi Ministry of Housing & Urban Affairs Mission pawimawh tak mai Swachh Bharat Mission (Urban) kengkawhtu a ni a, thawktute thawhrimna leh tanrualna avangin tunah chuan Mizoram khawpui chhung chu Open Defecation Free (ODF) a puan a lo ni ta a, zokhaw lamah pawh ODF hi puan vek a nih theihnan chak taka hmalak mek a ni, tiin a sawi bawk a ni.

Tun dinhmunah Ministry of Housing & Urban Affairs ruahmanna North Eastern Region Capital Cities Development Investment Programme (NERCCDIP) hnuaiah SIPMIU, UD&PA chuan Aizawl khawpui tan Solid Waste Management Sub-Project a kalpui mek a, he project hi zawh fel a nih hunah Aizawl Municipal Corporation (AMC) hnenah hlan a ni ang a, AMC hian a enkawl zui dawn a ni, a ti. Swachh Bharat Mission hnuaiah Solid Waste Management Centre, Kolasib-ah din turin hmalak mek a ni a, zawh fel thuai beisei a ni a ti bawk a, Lunglei khawpui tan pawh Development of Solid Waste Management Centre dinna tur Ministry of DoNER atangin sanction hmuh tawh a ni a, hna tender tawh niin hnathawktu tur ruat theih thuai beisei a ni, a ti.

Minister chuan kum 2016-17 atang khan Mizoram Sorkar Flagship NEDP hnuaiah UD&PA hian District khawpui pariat (8) bakah Urban Town sawmpanga (15)-ah faina leh thianghlimna chungchangah hma a la bawkin, Mizoram Sanitation Task Force din bakah district tin ah DC kaihhruaina hnuaiah Sanitation Task Force din a ni a, khawpui hrang hrangah inzirtirna kalpui a ni a, duhthusamin hma la thei loh mah se, hma chu a sawn ve bek bek zel a ni, a ti. National Green Tribunal leh Supreme Court atangin Solid Waste Management Rules, 2016-in State-te tih tura a tuk chu hmalak tan niin, hmalakna tur a tam hle, tiin a sawi. Faina leh bawlhhlawh sawngbawlna kawnga hmachhawp hrang hrang awmte chu chak tak leh tluang taka kalpui chhoh a nih theih nan leh Aizawl khawpui chhunga UD&PA Department leh Aizawl Municipal Corporation mai bakah District hrang hranga Sorkar Department/Office ten an mawhphurhna leh bawlhhlawh sawng bawl danah hma an sawn  theih nan Consultation Workshop pawh buatsaih a ni a, hemi atang hian Mizoram pawhin faina kawngah bung thar an kai theih  UD&PA chuan a beisei a ni, a ti.

UD&PA Secretary Dr. C.Vanlalramsanga chuan Workshop hi kaihruaiin, a hawnna thu a sawi a, he Workshop-ah hian UD&PA Official te leh district hrang hranga nodal officer-te an tel a ni. Programme hi Technical Session Pahnih-ah then a niin, Overview of Solid Waste Management Rules, 2016; Overview of Plastic Waste Management Rules, 2016; Overview Construction & Demolition Waste Management Rules, 2016; Present Status of Solid Waste Management in Aizawl City; Scientific Management of Solid Wastes te bakah thil pawimawh dangte zir ho a ni.