Vawiin chawhnu khan UD&PA Minister Pu Zodintluanga chuan JNNURM sub-component, BSUP kaltlanga khawpui chhunga mirethei chenna in nei theilote awmna tur, beneficiary te hnena hlanna hun, Grounding Day chu a hmanpui. He hunah hian UD&PA Minister chuan  sawrkar aiawhin EWS Housing complex chu  a luahtu tur te hnenah  inneitu nihna a hlan a. Official Programme zawhah beneficiary te hian pawhfuh hmangin an chenna in an thlang a ni.  

UD&PA Minister Pu Zodintluanga chuan Aizawl khawpui huam chhungah Jawaharlal Nehru National Urban Renewal Mission (JNNURN) sub-component Basic Services to Urban Poor (BSUP) project, Economically Weaker Section (EWS) Housing Complex, hmun 4 ah sak zawh a ni tawh tiin "Lawipu EWS complex-ah chhungkaw tam tak an awm tawh a, hmanniah Durtlangah Grounding Day kan hmang tawh bawk a; vawiinah Rangvamualah beneficiary te hnenah chenna in kan hlan leh thei hi a lawmawn hle a ni", a ti. Beneficiary chungkua te chuan an inthar chu an damchhungin an luah theih tur thu leh an fate pawh an awmzui theih tur thu a sawi a. Amaherawh chu midang hnena luahchhawn tirtu te chu hnawhchhuah an ni anga, an luahtir te pawh hnawhchhuah an ni ang a ti. Rangvamual EWS housing Complex inthar nei tur te chu duhsakna hlan nghalin sawrkar chuan an duhsaknate chu khua leh tui tha nih tumna nen chhanglet tur leh uluk taka enkawl chhunzawm turin a chah a ni. 

UD&PA Minister chuan, "Kan sawrkar chuan miretheite chawikan leh an hamthatna tur ngaihtuah in kan ngaihtuahna leh kan thahrui zawng zawng kan senga;  programme lian zawng zawng pawh miretheite tihhmasawnna turin kan siam a ni. BSUP component hnuaia EWS Housing hi khawpui chhunga mirethei chenna inhmun nei lo, chenna in sakna tur pawisa pawh neilote tan a ni a. Khawpui chhunga cheng tho khawsak harsa zual, in nei mek, thawmthatna nei si lo puih ngaite tanpui nan Chief Minister Housing scheme kaltlangin chhungkaw pakhat tan, tanpuina sum Rs 50,000/- chu a dawngtu tur dik tak te hnenah pek a la ni dawn a ni. Urban Development hnuaiah- kawngpui leh kawngkual lai zauh, sawrkar building tha pui pui sak, parking area siam, Road Signage, pavement leh a dangte sawrkarin a siam a. Hetih lai hian Poverty Alleviation huang chhungah nasa takin tan kan la mek a; UD&PA chuan Poverty Alleviation hnuaiah miretheite chawikanna hna lian tak tak a thawk mek  bakah hmachhawp pawh tam tak a nei a ni", a ti. 

Thusawitu dang, bialtu MLA Pu K Sangthuama chuan EWS Housing Complex luah thar tur te chu Rangvamual khua leh tui rawn ni thar tur te an nih angin khawtlang hruaitute thuawih tur leh sawrkarin tihtur a tuk te zawm tha turin a chah a. An in thar atangin in tha zawk mahni puala an la sak leh theihna tura rilru nei tur leh tan la chhunzawm turin a fuih a ni. 

Grounding of Rangvamual EWS Housing Complex  Programme hi UD&PA secretary Dr. C.Vanramsanga'n a kaihruai a. He hunah hian beneficiary te bakah Rangvamual khawtlang hruaitute leh sawrkar official pawimawhte an tel a. Pu Laldingliana, AE, UD&PA hnena atangin Technical Report ngaihthlak a ni. Rangvamual EWS Housing Complex hi hmun 2-ah sak a ni a, a sakna atana senso zat chu Rs 3075.00 lakh niin JNNURM hnuaia BSUP atangin Fund hi hmuh a ni.

Vawiina hawn tak hi block 10 a ni a,  building block 1 ah hian chhawng 4 zel awm in chhungkaw 16 an awm thei a; vawiin hawn tak block 10-ah hian chhungkaw 160 an cheng thei dawn a ni. In pakhat hi Sq.Metre 27.67 a zau, Dweling Unit(DU) tia vuah niin Electric wiring leh  tui herh haw na(plumbling system) vuah(fitted) lawk sa vek niin overhead water tank 500 Litres a nei hrang vek a; electric connection leh tui connection hi a luahtu tur ten an luah hunah an buaipui leh thlatin fee pawh an chawi a ngai thung dawn a ni.

Vawiina hawn tak Rangvamual EWS Complex  bakah hemi project in a huam tho hi block 13, chhungkaw 208 chen theihna tur chu Edenthar Veng hnuaia Chaltlang ram huam chhung Hmawngtial ram-ah sak zawh tawh a ni.  Official Programme zawhah hian Drawing of Housing Slots for beneficiaries neih a ni a, he hunah hian pawhfuh hmangin  beneficiary ten an in tur an thlang a ni.

 

Attachment

  • Loading attachment...