New Economic Development Policy (NEDP) hnuaiah State sum leh pai dinhmun tihhmasawnna tur ruahmanna “My Project, My NEDP - Mipui Mamawh Intawm Ruahmanna (MiMIR)” chu Mizoram District tinah kalpui turin ruahman a ni a. Vawiin khan Aizawl DC Pi A. Muthamma hovin hemi chungchang ngaihtuah hian official te DC Conference Hall, Aizawlah an thukhawm.

MiMIR project hnuaiah hian a duh apiangin khawtlang tana tangkai, mipui inhmantawm theih tur developmental project liantham siamna tur ruahmanna thehluh tur a ni a. June, 2018 atanga August, 2018 thleng hian inelna (open competition) buatsaihin project concept paper hi August ni 16 thleng thehluh theih a ni.  MiMIR atan hian sum cheng vaibelchhe 8 ruahman a ni a, District tinah project pakhat atan cheng vaibelchhe 1 zel dah a ni.

Local Council leh Village Council hnuaiah Joint Committee din niin YMA, MUP leh MHIP atangin member pahnih theuh an tel ang a. Concept paper hi mimalin sawrkarah thehlut lovin Joint Committee kaltlanga thehluh ngei tur a ni. Project Concept Paper thlang tu tur MiMIR Committee hi District tinah DC te kaihhruaina hnuaiah din a ni bawk a. He Committee hian project tha zual 20 a thlang chhuak phawt ang a, chumi hnuah he Committee vek hian project thazual 20 atang hian a tha ber pakhat an thlang chhuak leh dawn a ni.

MiMER  Committee ah hi Aizawl DC  chu  Chairman  tur a niin  member  dang Sorkar Department thenkhat atanga ruat a ni bawk a. Prominent citizens  pathum  telh tur a ni bawk a. Chu chu  member ten lo ngaihtuah  lawk a, meeting leh hun a thlan tura ruat a ni.