1611/2024-2025

Siaha the 15th August 2024: Mizoram Sawrkar hnuaia Urban Development & Poverty Alleviation Department changtu Minister Pu K Sapdanga chuan vawiin chawhnu dar 2  khan cheng nuai 420 senga sak Thosai, Siaha an Artificial Football Turf a hawng.

Hawnna inkhawmah hian Minister Pu K Sapdanga chuan kalkhawmte chu zalenna ni chibai a buk a, vawiina hawn tak field chu infiamna in hma a sawn deuh deuh theih nan leh tangkai taka hman a nih theih nan duhsakna a hlan.

Thosai khuain field tha tak an nei ta chu a lawmpui takzet a ti a, a bik takin thangtharte tan a lawmawm lehzual a ti. Mizoramah khelmual tha chu khaw tinin an nei thei lo a, a nei tlemte zinga mi an ni tiin Thosai mipui mai bakah Siaha leh a chhehvel khuaa a hmangtu tur te a lawmpui thu a sawi bawk. Football field tha neih chu thalaite tan chauh nilovin nu leh pa te tan a hlu hle a ti a, tunlai nu leh pa te timangang a, tirumtu ber chu ruihhlo a ni a, kan tu leh fa te ruihhlo laka min ven sak thei tu a ni ngei dawna a hriat thu a sawi a, duhsakna hlanin tha taka enkawl chhunzawm zel turin a chah a ni.

Thosaia hawn tak Artificai Football Turf hi a project hming chu Providing & Installation of Artificial Football Turf at Thosai tih a ni a, cheng nuai 420 senga sak niin contractor chu Gallant Sports & Infra Pvt Ltd Gurgaon te an ni. He project hi State Fund atanga sum hmuh hmanga thawh a ni a, Administrative Approval leh Expenditure Sanction (AA & ES) sawrkar atanga hmuh a nih hnuah Open Tender kaltlangin a thawktu contractor hi thlan a ni. Field len zawng hi 94 m x 49m a ni a, drain hi RCC hmanga field kualchhuak veka siam vek a ni bawk. Field kualchhuak vekin fencing hi 1.5m sang siam a ni a, field bulah hian vantlang tan zunin leh inthiarna tur siam a ni bawk.

Hawnna inkhawm hi Siaha District Bawrhsap Pu VL Hruaizela Khiangte chuan a kaihruai a, Upa N Beima in hunserh hmangin Pu C Malsawma, Executive Engineer, UD&PA chuan technical report a pe. Thosai VCP Pu N Beihmochhua hnen atangin thusawi tawi ngaithlak a ni a, Pu Vanlalchhuanliana, SDO (S) chuan lawmthu sawina neiin hawnna inkhawm chu tih tawp a ni.