1610/2024-2025
Siaha the 15th August 2024: Vawiin chawhma dar 9:30 khan SDFA Ground, Meisatla Siaha-ah Independence Day vawi 78na chu ropui taka lawm a ni a, Home Minister Pu K Sapdanga chuan Khuallian niin he hun hi a hmanpui a, Hnam puanzar pawt pharhin parade contingent-te chibai a chhang let.

Khuallian chuan India in zalenna a hmuh champha lawmnaa kalte chu chibai a buk a, hun hlimawm tak hmang theuh turin duhsakna a hlan.

Minister Pu K Sapdanga chuan India ram tana zalenna sualtute zahna chibai bukin zalenna hlut zia kan hriat thar a pawimawh hle a ti a, ram zalen ni tur te, mahni a inrelbawl thei turte in mi tam takin nunna thapin an lo sual chhuak a. Ram leh hnamin zalenna kan hmuhte chu hre pha tawh lo mahse vawiin ni a dinhmun awhawm taka kan din theihna chhan chu anmahni vang a ni tih hre thar leh turin kalkhawm mipuite a chah.

Ram thenawm thenkhata an ram inrelbawlna kawngah te, economy a tlakchhiat avangte leh harsatna hrang hrang avanga an buainate thlirin India khua leh tui nih vanneihthlak zia a chiang lehzual hle a ti.

Khuallian chuan a bik takin zirlai kalkhawmte chu a fuih a, tunlai khawvel thiamna sang taka hmasawnna, changkanna leh awlsamnate a tha zawnga hman tum theuh tur te, internet hmang tangkai thiam tur te leh Siaha thalaite chu zirna leh thiamna hmanga Mizoram awp tum tlat turin a chah. Kumin chhunga sawrkarin Siaha district chhunga zirna chawikan nana a thiltih thenkhat tarlangin Free School Uniform Grant atana cheng 55,37,400/- sen a nih tawh thu te, Elementary School zirlai 8,408 te hnenah textbook pek chhuah a nih tawh thu te leh Mid-Day Meal dawng pawh Elementary School 202 lai an awm a ti a, zirlai tumruh leh huaisen, taima tak tan chuan hlawhtlinna kawng a in hawng zau hle a ti bawk. Combined Competitive Exam tina Siaha thalaite hming lang ziah thin chu chhuanawm a ti hle a, chu hmingthatna chu chhunzawm zel turin a fuih bawk.

Mizoram sawrkar tharin thlai thar 4; sawhthing, hmuhphiah, hmarcha leh aieng te lei tura a lo sawi tawh chu a taka tih hlawhtlin ngei an tum a, kuthnathawktute tana hlawkpui theih tur eizawnna chi hrang hrang a awm thu sawiin Siaha district chhungah Muga Silk Industry Development Project hmangin khaw 21 a chhungkaw 400 in silk pangang khawi turin hma an la mek a. Sawrkar tha chakna ringin an hlawhtlin ngei a beisei thu a sawi. Sawrkar laipui scheme kal lai NREGS, PMKSY, Rural leh Urban Livelihoods Mission leh scheme hrang hrang hmangin mipui ten hmasawnna rualkhai zawk an dawn theihna turin sawrkar hnathawkte pawhin harsa zawkte tanpui duhna tak tak nen hna thawk zel turin a sawm bawk. Khuallian chuan sawi zelin Khua leh tui ten hriselna tha an neih theih nan Health & Family Welfare Department a thawktute rim taka an thawk thin chu lawmawm a ti a, TB leh HIV positive enkawl leh a vei hmuhchhuah kawngah te, tlang hri leng ven kawnga an thawh that zia te, Kumin chhunga Siaha district-a nau piang awm zawng zawng 242 zinga za a 97 te damdawi ina piang an ni chuan thawktute thawhrim zia a tichiang hle a, Inkalpawhna, inenkawlna khawl tha leh thil dangah harsatna nasa tak avangin nausen 41 kumin chhunga kan chan erawh hriat a hrehawm a tih thu a tarlang a, Nu naupai lai leh nausen enkawl kawngah zirtirna tha leh an mamawh hriatthiam puina (awareness tha) kan mamawh hle a ti bawk.
Siaha District chu khawpui nuam, ralmuang leh hmasawn tak a nih theihna turin bang bik kan awm lo tih hre thar leh turin kalkhawmte a chah a ,dikna, rinawmna leh huaisenna nen, Pathian rinchhan tlat chungin mahni hna thawk theuh turin a sawm hlawm bawk a ni.

Vawiin 78th Independence Day lawmna ah hian Inspector Beihai Hlychho Siaha DEF chuan kum 38 a service chhung a hna thawh entawntlak tak avangin Governor’s Gold medal a dawng a, Minister Pu K Sapdanga chuan he award hi a hlan nghal a ni. Hei bakah hian kumin MP Election a Best Polling Party te lawmman pek an ni bawk a, Best Polling Party lawmman dawngtute chu
1) Chakheitla 40-Palak AC (ST)
2) Thiahria/ Noaohtla 39-Siaha AC (ST) te an ni.

Vawiina Parade Commander chu Siaha SDPO Pu Lalnunhlua MPS a ni a, 2nd Commander Inspector H Lalramnghaka, Company Commander 3rd IR Bn Siaha a ni. Presbyterian English School, Siaha ten mawi takin National Anthem an sa bawk. Vawiina Independence Day lawmna ah hian Parade Contingent 22 an tel a, Armed Contingents-2, Unarmed Uniform Contingents-2, School Contingents 17 leh Govt High School Pipe Band te a tel a ni. Independence Day puala parade titha lawmman dawngtute chu;

1) Hill Gate School, Siaha
2) Southern English Comprehensive School
3) Auxillium English School te an ni.

Minister Pu K Sapdanga hian Independence Day lawmna programme zawh hian Mara Autonomous District Council a Chief Executive Member (CEM) Pu M Laikaw buatsaih VIPs at home chu sawm bikte nen a hmanpui bawk a, Hemi zawh hian Thosai khua-a cheng nuai 420 senga siam Artificial Football turf chu Khuallian niin a hawng chhunzawm a, Lawngtlai a riak turin vawiin vek khan Siaha a chhuahsan nghal a ni.

Attachment

  • Loading attachment...