4856/2024-2025

Khawzawl, 27th March 2025: Urban Development & Poverty Alleviation Department buatsaih District Beautification Competition-a lawmman pakhatna dawngtu Khawzawl District-te chuan vawiin khan lawman pakhatna an dawn lawmna leh project khuhhawnna chu DC Office tualah an nei a. UD&PA Minister Pu K. Sapdanga chuan he hun hi khuallian niin a hmanpui a ni.

Khuallian Pu K. Sapdanga chuan he hunah hian District Beautification Competition chu inelna dangte nen khaikhin chuan inelna danglam tak a nih thu sawiin, pakhatna nihna chuan bultanna a entir chauh a ni, a ti a. Inelna lawmmanah pawh Mizoram chhunga inelna lawmman tam ber tih theih turin pakhatna atanga pathumnate hnenah cheng nuai 50 theuh pek chhuah anih thu sawiin UD&PA Minister chuan he pawisa hmanga Khawzawl khawpui an cheimawina turah mipuite chu duhsakna sang ber a hlan tih a sawi bawk.

UD&PA Minister chuan Khawzawl District-in lawmman a dawn theihna tura thahnemngai taka thawktu District Administration leh District Urban Development Office (DUDO) te a lawmpui thu sawiin, an sum dawn te chu ei bo bar mai tur ni lovin, khawtlang leh District Headquarters cheimawina tur a ni tih hre hre turin a chah a. An ruahmanna te tihlawhtling turin sawrkar pawh an hnungah a awm zel dawn a ni tiin, ruahmanna mawi ber chauh ni lova District Headquarters mawi ber ni ngei tura inbuatsaih zel turin a fuih bawk a ni.

He hunah hian Khawzawl Bawrhsap Pu K. Vanlalthiana pawhin thu sawiin District Beautification Competition-a Khawzawl tana thahnemngai taka thawktu DC Office leh DUDO Office a thawktute tanhona leh an zavaia an thawhrimna rah a ni, a ti a. District cheimawina kawngah kalkhawmte chu inlungrualna, inhmangaihna leh inlainatna thinlung pu chunga bul tan puiah a sawm a; District mawi leh changkang ber siamturin Khawzawl District mipuite thawhpuina a ngen bawk a ni.

District Beautification Competition 2025 hi State Priority Project hnuaiah District lama official ten an District Headquarters chei mawi nan leh khawpui thang zela an District theuha hmasawnna daihrei an neih theihna tura duan a ni a. Competition hi December ni 17, 2024 ah kick-off a ni a. District tin hian an khawpui cheimawina tur leh thawmthatna tur hrang hrang atan District Beautification Detailed Project Report an buatsaih theuh a, inbuatsaihna tur hian December ni 17,2024 atanga February ni 26, 2025 thleng hun pek an ni a. February 27, 2025 ah DPR thehlut felin, February ni 28 ah District tinin Project Presentation an nei a ni. He inelna endik tur hian Mizoram University-a Department of Planning & Architecture atanga mi thiam tak tak te ruat an ni a. Anni hian March ni 3, 2025 atanga endikna (on-field assessment) tanin, March ni 12, 2025 ah endikna hi zawhfel a ni. District titha zual pathum (Top three winners) lawmman hian ₹. 50,00,000/- a keng tel a, Participatory Prize hian Rs. 2,00,000/-a keng tel theuh bawk a ni. Heng lawmman te bakah hian Judge te chetvelna atana senso ngai te, lawmman leh programme hrang hrang kan huaihawtna atan te bakah senso tul dang te nen District Beautification Competition budget pumpui atan hian ₹.1,70,93,000 dah a ni.

Khawzawl Beautification Project khuhhawnna hun hi Pu Suvigya.S.Chandra, SDO(S) chuan a kaihruai a. He hunah hian Pu Dingluaia, DIG (CID), Khawzawl SP Pu F. Lalbiakzauva leh Khawzawl a sawrkar pisa hotute, khawtlang leh tlawmngai pawl hruaitute an tel a ni.