DIRECTORATE OF INFORMATION & PUBLIC RELATIONS, Government of Mizoram, India

4857/2024-2025

Aizawl, March ni 27, 2025: Cooperation Minister Pu PC Vanlalruata chuan vawiin chawhnu khan Mizoram State Cooperative Union Golden Jubilee lawmna, MSCU Training Hall, Dawrpui a buatsaih chu khuallian niin a telpui a. He hunah hian Registrar of Cooperative Societies Pu John LT Sanga chu khualzahawm a ni.

MSCU hi kum 1975 March thla khan din a ni a. A din chhan leh tum ber chu Mizoram chhunga Cooperative Society te hmasawn zel theihna tura zirtirna (Education & Training) pek leh a tul dan ang zela district leh state huapa seminar leh workshop buatsaih a ni.

Minister Pu PC Vanlalruata chuan MSCU chu cooperative society tha leh thangduang siam tura tul em em zirtirna leh inhrilhriatna pek kawnga an hnathawh chu pawimawh a tih thu a sawi a. Training leh education chu society te tan thahrui a nih thu sawiin, kalphung dik zawk te, thawhho dan te leh hmasawn zel inhrilhhriat tul thu a sawi. Minister chuan India ram economy hmasawnna atana ram dan lo duang tu ten cooperative society an ngaipawimawh thu sawiin, vawiin thleng pawhin a pawimawhna a la reh lo a ni a ti a. Banking lamah leh digital service ah te, fair price shop lamah te Mizoramah ngei pawh cooperative society te an pawimawh chhoh zia a sawi a. Sorkar flagship programme hnuaia thlai hralh dan chungchangah pawh society te an pawimawh dan a sawi a. Minister chuan sorkarin society ten hma an sawn zel theihna tura a theihna chin chin a hma lak a nih tur thu a sawi a ni.

Khuallian chuan Jubilee Souvenir a tlangzarh bawk a ni. Khualzahawm Pu John LT Sanga, Registrar of Cooperative Societies chuan MSCU ten kum 50 tlin an lawm thei chu ropui a tih thu leh hma sawn belh ze tura a duhsakna a hlan a. MSCU hian society te tan rawngbalwna hna tha tak an thawh thin thu a sawi a ni. Khualzahawm chuan United Nation chuan kum 2025 chu UN International Year of Cooperatives ah puang in, thupui ah 'Cooperatives build a better world' tih a thlan thu a sawi a. Heihian kan ramah chauh nilo khawvel chuan Cooperative Society te pawimawh zia a tihchian thu a sawi a. An thupui thlan cooperative society hrang hrang ten khawvel chenna nuam zawk a siam tih thlan chuan khawtlangah, ei leh bara inthlauhna nasa lutuk sukiang a, hmasawn nan cooperative pawimawh zia leh, kan theihna tlang theuh a hma kan sawn theih nan theihtawp chhuah turin Pu John LT Sanga chuan kalkhawmte a sawm a ni.

MSCU Founder Pu Lalbiakthanga Pachuau, Padma Shree hnen atangin kum 50 kal taa cooperative union din tura hmalak a nih dan te ngaihthlak a ni. MSCU Golden Jubilee lawmna inkhawmah hi an president Pu K. Lalchamreia chuan kaihruaiin, CEO Pu K. Lalduhawma chuan report a pe a. Vice president Pu F. Lalchungnunga chuan lawmthu sawiin hun a khar a ni.

Attachment