Vawiin khan UD&PA Minister Pu Zodintluanga chuan Lunglei Venglai Hall sakna tur lungphum a phum.

Lunglei Venglai VCP C.Lalhmingmuana kaihhruai inkhawm buatsaihah Khuallian Pu Zodintluanga chuan Venglai mipuite beidawn tawh hnu leh Venglai huamchhungah hmun awl a vang hle chungin sorkarin theihtawp a chhuah avanga Community Hall thar sakna tur ruahman sak a ni thei ta chu a lawmawm hle a ni, a ti a. Minister chuan duhamna, eirukna leh chhung leh khat induhsakna avangin ram mamawh tam tak tih hlawhchham a ni tawh a, mipuite pawhin dik taka hnathawk thin te chu chawimawina chang hriat a pawimawh tak zet a ni, a ti.

UD&PA DUDO, Lunglei Pu R.L.Zidinga chuan technical report pe in, Integrated Housing and Slum Development hnuaiah Community Centre anga kalpui a nih tur thu a tarlang a. Hall sak bul tan nan Cheng 32,59,244 ruahman phawt a ni a. Ground Floor hi 36mts x 670mts a ni ang a, thla 12 chhunga peih hman tura beisei a ni, a ti. Venglai Community Hall sak tur hi a dung feet 100 leh a vang feet 65 vel zeta zau tur a ni a, Police ram thin niin khawtlang tan an pe a ni tih a sawi bawk. UD&PA hmachhawpah hian Lunglei Venglai bakah Salem Veng leh Lungpuizawl ah te pawh Hall sak zel tum a ni.