Mizoram Sorkar hnuaia Sports & Youth Services Department chuan Mizoram State Sports Council kaltlangin SAI Boys Hostel, Lunglei-ah Gymnasium changtlung tak a bun fel ta a. Vawiin khan Lunglei-a cham mek Sports & Youth Minister Pu Zodintluanga chuan Gym hi a tlawh a ni.

Sports Minister Pu Zodintluanga chuan Lunglei-ah Gym changtlung tak neih theih nan Special Plan Assistance a bawhzui hlawhtling thei ta chu lawmawm a tih thu a sawi a. Thalaite insawizawina leh intihchakna turin khawvel huap pawha zahpuiawm lo USA siam hmanrua (equipments) hrang hrang Gym-ah dah a ni tih sawiin Minister chuan Mizo thalai infiammiten intihchakna tur hmanrua an nei tha lo tih hriain sorkar chuan theihtawp a chhuah reng a ni, a ti. Ramchhung leh rampawn intihsiaknaa tel ve thin Mizo infiammite harsatna ber chu ‘fitness’ tha tawk nei lo a ni fo thin a, Gym changtlung tak neih takah chuan thalaite pawhin hman tangkai nachang hria se a duh thu Minister hian a sawi a ni.

Lunglei SAI Hostel Gym-a dah ang gym equipment hrang hrangte hi Aizawl leh Champhai-ah te bun fel a ni tawh nghe nghe a ni.