Vawiin chawhma dar 11:00 khan Fisheries Department hnuaia NLUP thlangtu te tan 2nd Phase 2nd Installment sem a ni.

He hun Kahrawt YMA Hall-a hman, Pu BD Tyagi DFDO kaihhruaiah hian thu sawiin khuallian Pu TT Zothansanga, Champhai North Bialtu MLA chuan, ‘kan party kan sawrkar chuan NLUP kan sem ang tiin inthlan hma khan kan sawi tawh a, tunah a taka changtu kan ni hi a lawmawm a, sorkar chungah lawmthu kan sawi tur a ni, a ti a. Tunah hian 2nd phase kan ti mek a, 3rd phase pawh karleh lamah hian chhunzawm leh tur a ni a, sum pawh a awm tawh a ni tih a sawi. Khuallian chuan, hnathawhna turin pawisa kan dawng dawn a, a takin heng pawisa te hi kan hmang tur a ni tiin sorkar chuan kan duh ber hmanga bul kan tan theih nan duh min thlan tir a, vawiina Sangha khawi thlangtu kalkhawmte hian kan hlawhtlinpui ngei tur a ni a ti. Pu TT Zothansanga chuan, Sorkar in NLUP hmanga bul tan, la hlawhtlinglo leh laklawh taka awmte tan Exit Protocol Policy a siam a ni tih sawiin, NLUP dawngtute thlaphanglo turin a :fuih bawk a ni. Khuallian chuan Food Security Bill, chungchang sawiin, tunah rih chuan Mizoram hian kan la tlin chiahlo a ni a ti a, Food Security Bill ah chuan- Buhfai 1kg Rs 3 in an lei a, thla khatah 5kgs chiah ration an dawng dawn a, tunah hian Mizoram hian kan hmang dawn anih chuan kan ration system hi kan tihdanglam vek a ngai dawn a, thla khatah 5kg lo khamlo ta ila, dawrah man to taka lei leh tho a ngaih dawn avangin sorkar chuan enchhin rih phawt nise a tih thu a sawi.

He hunah hian F. Lalrinnunga VCP Kahrawt veng leh Hmingthanzama President Champhai North Block Congress Committee te pawhin thu an sawi bawk a ni.

Vawiina NLUP 2nd Phase 2nd Installment sem hi Champhai North, leh South huamchunga beneficiaries te tana sem a ni a, thla thar ni 2 hian Khawzawl-ah sem leh a ni anga, ni 6 hian Farkawn ah sem a ni leh bawk ang.