4476/2025-2026

Dated Aizawl, the 14th February, 2026: Pu K. Sapdanga, Minister, Urban Development & Poverty Alleviation Department, etc. chuan vawiin khan minibus-a chuangin a department hnuaia hna thawh lai mek hmun 10 a tlawh a. A hmun tlawhte chu: Hualngohmuna Construction & Demolition Waste Processing Centre; Hlimen Playground; Mission Veng New Age Multifaceted Urban Centre; Pu Thangfala Colony, Chawnpui bula Storm Drain; Pi K. Sangthuami In, Chawnpui bula Storm Drain; Zotlang Green Cemetery; NH 108, Hunthar bula Storm Drain; Hunthar By-Pass Road; Vaivakawn Thlanmual thar panna Approach Road leh Maumuala internal road leh New Market bula City Centre te a ni.

Minister hi UD&PA official-te Pu Lalmalsawma Pachuau, Secretary; Pi Zarzokimi, Joint Secretary; Pu Jacob Lalawmpuia, Director; Pu Vabeimozachhi Chozah, Under Secretary; Aizawl Smart City Ltd (ASCL) atangin Pu CC Lalchhuangkima, CEO leh Pu V.Lalruatliana, Deputy CEO bakah PWD atangin Pu Hrangthanga Zote, Chief Engineer, PWD (Buildings & Other Departments) te’n an tawiawm a. Minister hian a satu contractor-te kawmin hnathawh kal mek leh hmabak la awmte a zawtfiah a ni.

Hualngohmuna Solid Waste Management Centre hi a tir chuan bawlhhlawh sawngbawlna atana duan ni mah se in sakna atana chak chhia leh in thiahna sawngbawlna hmun, Construction & Demolition Waste Processing Centre atana ruahman a ni ta zawk a. SASCE 2021-22 hnuaia cheng nuai 1664 senga sak tur niin Mizoram PWD Project Division-IV chu implementing agency niin, contractor Pu V. Lalbiakzama, College Veng a ni a. April ni 7, 2023 atanga hna tan niin, hna 60% thawh zawh tawh a ni a. Kumina zawh fel beisei a ni. He’ng in sakna chak chhia leh in thiahna sawngbul hnute hi in sak nana hman nawn theiha chhuah (recycle) dan sawi ho a ni.

ASCL hnuaia Hlimen Playground (khelmual) hi cheng vaibelchhe 10.62 senga sak tur a ni a, contractor chu M/s Lalhming Infrastructure & Construction Pvt. Ltd. niin April, 2022 a hna thawh tan a ni a, hna hi 98% thawh zawh tawh niin February ni 28, 2026 hian zawhfel an inbeisei a, khelmual hi 101m x 51m a zau a ni a, gallery mi 696 len theihna a awm bawk a, office, ticket counter, snacks counter, VIP lounge, lobby, support staff room, sports bungraw zawrhna dawr, support staff room – 2, coach room, players washroom – 2, lockers area – 2, team dressing room – 2, pantry, mipa leh hmeichhe inthiarna a hrangin 2 ve ve, bakah four wheeler 14 leh two wheeler 41 len theihna tur parking area a awm bawk ang.

ASCL hnuai bawk, Mission Veng-a New Age Multifaceted Urban Centre hi SASCI atanga cheng vaibelchhe 9.51 senga sak tura duan a ni a, October ni 30, 2024 khan Tender chhuah niin, contractor chu Kings & Prophets an ni a. March ni 17, 2025-ah hna tan a ni a, hna 10% zawh tawh niin, March ni 16, 2027-a zawhfel hman beisei a ni. Auditorium Hall, Chowkidar Quarter/Store room, Workshop; Store – 4 nos., e-library room, Learning Centre Room; Old Age Recreational Room; Conference Room/Meeting Room; Badminton Court – 3 nos. Mini Gym/Common Green Room; 4W & 2W Parking; Water tank/Services Room/Septic Tank te awm tura ruahman a ni.

Pu Thangfala Pawl Building, Chawnpui bula Storm Drain hi cheng nuai 93.92 senga 180m-a sei, 1.5 x 1.0m-a liana siam tura duan a ni a. Eastman Consultancy-te contractor niin, hna 30% zawhfel a ni tawh a ni. ARDECO Design Build-te’n consultancy hna an thawk a ni.

Chawnpui Vengthlang-a Pi K. Sangthuami Building leh MINECO Road inkara Storm Drain hi cheng nuai 79.70 senga 200m-a sei, 1.2x0.9m-a liana siam tura duan a ni a. Senhri Agency-te contractor niin, hna 70% zawhfel a ni tawh a ni. ARDECO Design Build-te’n consultancy hna an thawk a ni.

Zotlang Green Cemetery hi cheng nuai 485.34 senga 913.8 sqm / 9836 sq.ft-a zauva sak tura duan a ni a. TIBERIA-in hna thawkin 30% zawhfel a ni tawh a. Chhungkaw 165 inphum theihna tur RCC Burial Vault ruahman a ni a, seepage pit awmin, Vault khatah a tam berah ruang 7 phum theih tura duan a ni. Minister chuan Aizawl khawpui chep takah ram dang, hmun dang tichereu lova Zotlangin hmun khata inphum theihna an nei chu tha a tih thu a sawi a ni.

Hunthara NH108 thlanga Storm Drain hi cheng nuai 777.16 senga 800m-a sei, 2.50x1.55m-a liana siam tura duan a ni a. Vaube Projects-te contractor niin, hna 20% zawhfel a ni tawh a ni. ARDECO Design Build-te’n consultancy hna an thawk a ni.

Hunthar By-Pass Road hi Hunthar Cemetery atanga Hunthar Middle School inkara tlan tur a ni a, cheng vaibelchhe 17 senga siam tur niin, M/S J&L Associates-te’n hna an thawk a. Metre 3367-a thui tur a ni a, a kawng zau zawng hi 5.2m (3.75m pavement, 1m footpath, 0.45m drain) a ni ang. Hunthar national highway a lei tlahniam thinin Mizoram pumpui tan harsatna tamtak a thlen thinte a lo ziaawm deuh theih nan hun rei tak ata rawtna lo awm tawh chu SASCI hnuai atangin tihhlawhtlin tuma hmalak mek a ni a. He kawng hi tha taka tih tlang a nih hunah chuan kawng tam taka hman a nih beisei a ni a, Aizawl khawpui zauh belhna a nih piah lamah, leimin nasatna hmun helna a nih dawn avangin a tangkai hle tura rin a ni. Tin, he kawng hi motor te (medium vehicle) chin tlan theihna tura ruahman a ni.

Vaivakawn Thlanmual thar panna Approach Road leh Maumuala internal road siam hna hi A/E Construction-te’n an chang a, October ni 22, 2025 atanga thawh tan niin, thla 18 chhunga zawh hman tum a ni a. Lei laih hna (earth work) kar hnih chhung thawh a ni a. December ni 8, 2025 atangin RCC kawng chhun tan niin, ni 22 chhung chhun a ni a. February ni 5, 2026 khan chhun zawh a ni.

ASCL hnuaia Aizawl New Market, Dawrpuia a City Centre hi cheng vaibelchhe 41.59 senga sak tur a ni a, contractor chu M/s Lushai Engineers niin October, 2022 a hna thawh tan a ni a, hna hi 72% thawh zawh tawh niin December, 2026-ah zawhfel an inbeisei a, City Centre-ah hian dawr (stall) 1102 a awm dawn a, mihring leh bungrua bik tan lift ruahman niin, cold storage, CCTV, ATM, food court, office leh conference room baka four wheeler 31 leh two wheeler 79 len theihna tur parking area a awm bawk ang.