2834/2025-2026

Dated Aizawl, the 8th January, 2026: Vawiin khan Mizoram chhunga khawpui hrang hrangte tih hmasawnna tur Storm Drain Projects leh Major Works dangte chu Urban Development & Poverty Alleviation (UD&PA) Department Minister, Pu K. Sapdanga chuan Planning & Programme Implementation Department Conference Hall-ah a khuhhawng a. He khuhhawnna inkhawmah hian Land Revenue & Settlement Minister Pu B. Lalchhanzova, Aizawl West-I bialtu MLA Pu TBC Lalvenchhunga, Aizawl West-III bialtu MLA V. Zaithanzama, Aizawl South-II bialtu MLA Pu Lalchhuanthanga leh Champhai South bialtu MLA Lt. Col. Clement Lalhmingthanga-te an tel a ni.

Minister Pu K. Sapdanga chuan vawiinah hna pawimawh tak, khawpui hmasawnna tur chauh nilo, khuarel chhiatna thleng thei laka khawpui venhimna hna khuhhawn a ni chu lawmawm a tih thu a sawi a. Kan khawpui-ahte hian hmasawnna hna kan mamawhte zinga hmanhmawhthlak ber chu tui luan kawr tha a ni, a ti a. Zirbingna atanga a lan danin Aizawl khawpui chhungah inthiarna leh choka-a tui kan hman ral hi nitin litre mtd 48.6 a ni a, heng tuite hi tui luan kawr thleng pha lova leia tham ral deuh vek an ni a, furah a let tamtak tui a lo luang bawk a, hei hian lei chung lang chiah hnipin, kan chenna khawpui hi a kum telin a derthawng tial tial a, chhiatna rapthlak kan tawk ang tih a hlauhawm thu a sawi a. Hei hi sawrkarin ngaipawimawhin in tin atanga tui chhuak zawng zawng leh ruahtui luan luhna tur tui luan kawr siamna tur Storm Drain Project duan a ni, a ti a.

Minister chuan he project hi chhiatna thleng thei laka khawpui venhimna hna a nih avangin hna thawktu contractor-te pawh chhanhimna hna anga ngaia, hmanraw tha hmanga, hun bi ngai pawimawha, hna tha taka thawk turin leh chhiah chawi chungchangah pawh dan zawm turin a ngen a. Local Council hotute pawh an veng theuha hna thawhte uluk taka vil turin a chah bawk a. Project lian bakah Composite work hrang hrang - step siam te, retaining wall siam te, vengchhung kawng leh tui luan kawrh tenau siam te pawh kalpui mek zel a nih thu a sawi a. Heng composite work-te hi a veng mite emaw a bul hnaia in neituten an thawh ve ngaite a nih thin avangin awmze nei zawka kalpui a nih theih nan inkaihhruaina ‘Guidelines for Implementation of Urban Composite Works under UD&PA Department’ duan a nih thu a tarlang a. Mipui tam thei ang ber huap project tha leh kan khawpuia chen tinuamtur hmasawnna ruhrel hrang hrang duan zel hi sawrkar leh UD&PA Department duhdan a nih thu a sawi a ni.

Minister Pu B. Lalchhanzova pawhin he thutkhawmah hian thusawiin, kan rama leimin leh lei chetna hmunte thuamdam tura tui luan kawr siam a ni tur chu lawmawm a tih thu a sawi a. Tui luan kawr tha kan neih chuan kan khawpuite a faiin, mipuite thla a muang ang a, natna hrileng pawh a ziaawm tur thu a sawi a ni.

UD&PA Department hnuaia project khuhhawnte chu :–

1. State Assistance to States for Capital Investment (SASCI) hnuaia Aizawl khawpui chhung hmun 26 a tui luan kawr 8.135 kms siamna tur

2. District Headquarters hrang hrang 10 ah tui luankawr 11.514 kms siamna tur

3. Khawpui hmasawnna tur project hrang hrang - Multi Utility Building, Community Hall, Auditorium, Approach Road

4. Handholding Policy 2025–2026 hnuaia Aizawl khawpui chhunga composite urban development hna chi hrang hrang – Drain, step, retaining wall, culvert, approach road, footpath siam leh a dangte niin, a vaiin hna 237 awmin, hnathawh nan hian Rs. 1122 lakhs dah a ni.

He khuhhawnna inkhawm hi Pu Lalmalsawma Pachuau, Secretary, UD&PA chuan a kaihruai a, Pu Jacob Lalawmpuia, Director, UD&PA leh Pu C. Malsawma, Executive Engineer, UD&PA te hnen atangin presentation thlirho a ni a, Pi Zarzokimi, Joint Secretary, UD&PA chuan lawmthu sawiin hun a khar a. UD&PA Department hotute bakah Local Council hruaitute, contractor-te leh consultant-te an tel a ni.