India ram khawpui fai thlanna tur survey Swachh Survekshan 2017 atan inpuahchahna Swachh Aizawl City Plan-2017 chu vawiin chawhma khan UD&PA Minister Pu Zodintluanga chuan I&PR Auditorium-ah a tlangzarh a. Hemi rual hian Aizawl khawpui chu inthiarna mumal neilo awmlohna “Open Defecation Free (ODF)” ah leh bawlhhlawh a paihna hmunah chauh paihna “Littering Free Aizawl” chu a puang nghal bawk.

Minister chuan India khawpui fai intihsiak naah Aizawl chuan dinhmun sang tak a hauh theih nan Sorkar a tang hle a, chumi atan chuan Swachh Aizawl City Plan-2017 chu duan anih thu a sawi a. A hlawhtlinna erawh chu a kaihhnawih department te leh AMC, Local Council leh mipui tawiawmna ah a innghah avangin thahnemngai taka thawhhona neih a pawimawh thu a sawi. Aizawl khawpui ODF ah kan inpuang thei chuan faina kawnga kan hmasawnna tilangtu anih thu Minister sawiin, hun rei tak ngaihtuahna an lo sen tawh na - “Littering Free Aizawl” chu Aizawl khawpui veng tin a dah tur bawlhhlawh paihna bawm 890 semchhuah a nih hnuah a taka kalpui a ni thei ta chu lawmawm a tih thu a sawi bawk a. Pu Zodintluanga chuan bawlhhlawh a paihna hmunah chauh paih tur kan ni tih mipuiin kan vawn reng chuan khawpui fai ber kan ni thei thuai ang, a ti a. Aizawl khawpui chu state dangte nen khaikhin pawhin a fai tawh hle a, midang hriat tur pawhin kan in tlangzarh thiam a tha a ni, a ti a. Hmun dang atanga rawn kal te pawhin fai an tihzia news site thenkhat ah leh social media-ah te an lo sawi tawh thin a. A chhunga cheng te pawhin fai min tihna chu pawm tlang a, inthlahdah phahna erawh hmang lovin, fai belhchhahna zawk nan mi, titangtu ni zawk se, a ti a ni.

Vawiin hun hi Dr. C. Vanlalramsanga, UD&PA Secretary chuan kaihruaiin, School Education Director Pu K. Lalthawmmawia hnen atangin Swachh Vidyalayas hnuaia school naupang leh zirtirtuten faina kawnga hma an lakna te a tarlang a. Pu Joseph H. Lalramsanga, UD&PA Director chuan Swachh Survekshan atan inpuahchahna tlangpui leh vawiina tlangzarha tak Swachh Aizawl City Plan 2017 sawifiahna neiin, Dr. H. Lalthangliana, Municipal Commissioner hnen atangin Municipal Waste Management chungchang ngaihthlak niin, Er. Valbuanga, SIPMIU Programme Director hnen atangin Aizawl khawpuia tunlai thiamna hmanga bawlhhlawh sawngbawl tur hmalakna te ngaihthlak a ni bawk. Hun hi UD&PA Joint Secretary, Pu Vanlalmawia’n lawmthu sawiin a khar a ni.

Vawiin hunah hian Swachh Aizawl City Plan hmalakna a faina thu thehdarhtu (ambassador) atan thlanchhuah Swachhgrahis te hnenah Khuallian hian Identity Card a sem nghal bawk a. Heng Swachhgrahi te hi Local Council tin atangin faina leh thianghlimna lama veng mipuite hrilhhria a hmala turin NULM hnuaia Self-Help Group atangin thlanchhuah an ni. Aizawl hi ODF a puan a nih hnu hian Sorkar laipui atangin rawn endiktu an rawn kal leh anga, hemi rual hian ODF a inpuang tawh Champhai pawh enfiah a ni bawk ang. Littering Free Aizawl hnuaiah hian bawlhhlawh a paihna hmun baka paihte chu Rs. 5000 thleng pawisa chawi tir theih a ni dawn a ni.

lndia ram khawpui fai thlanna survey, Swachh Survekshan 2017 hi August ni 6, 2016 khan ram pumah tlangzarh a ni a. Nimin khan AMRUT City 73 enfiah zingah Aizawl chu 41-na a ni a. Kumin hian khawpui 500 enfiah an ni ang. Khawpui faina hi thuang thum a endik tur niin, chungte chu - (i) Municipal Documentation (AMC report), (ii) Direct Observation (Quality Council of India enfiahna), leh (iii) Citizen's Feedback (phone/social media leh Swachhata App kaltlanga report) te an ni. Swachh Survekshan intihsiakna an tehna hrang hrangah hrang hrang zingah khawpui bal leh hnawmhnawk intin atnga khawn khawm anih dan te, khawpui phiah fai te, community toilet neih dan leh ODF atana dinhmun te, bawlhhlawh sawngbawl dan te leh faina kawngah mipui hmasawnna te a tel a ni a. Swachh Aizawl City Plan-2017 ah hian heng category hrang hranga mark tha tak kan hmuh theih nan hmalak dan tur te tarlan a ni.