Vawiin hian Agriculture Minister Pu R. Lalzirliana chuan Serchhip District Agriculture Office building thar, cheng 125 lakh senga sak chu a hawng.

A hawnna inkhawm Building thar tuala neihah Minister chuan, Serchhip District Agriculture Office building, tha leh chang tlung tak hawn theiha peih a ni thei chu lawmawm a tih thu a sawi a, District dang zawng zawngah RCC Building hmanga DAO Office hi kan neih vek tawh avangin ti hian District tinin Concrete Building ngei Office kan nei kim ta a ni, a ti.

Pu R. Lalzirliana chuan, he hmun hi kan rama kuthnathawktu, ram mipui tam berte enkawlna hmun tur a nih avangin a thawktute pawh an inpe zovin biak an nuam tur a ni a, kuthnathawktute an tlangnel tur a ni. Intilal taka hnathawhna hmun tur a ni lo tih kan hriat thar leh ka duh a ni, a ti.Minister hian DAO building thar chu a sak phung a tha tawk hle nia a hriat thu sawiin a sak hnathawktu PWD Department chungah lawmthu a sawi a ni.

A hawnna inkhawmah hian Pi Lalhmingsangi, SDO, PWD Project Sub Division chuan Technical Report a pe a. Ni 2.4.2015 atanga sak tan niin 8.7.2016 ah an zo va, sum hi Rs. 125 lakh an seng a ni. A building len zawng hi a dung feet 56 leh avang feet 32 a ni a, a chhuat zawng zawng zau zawng hi 364.67 Sqm niin mizo chhiar dana chhawng hnih a ni. Tui litres 30,000 dahkhawl theihna tanky a neih bakah a panna kawng leh a tual zawlte chu PWD in an siam sak nghal bawk.

A hawnna inkhawm kaihruaitu Dr C. Lalzarliana, Director of Agriculture (Crop Husbandry) chuan, PWD ten building mawi leh changkang tak an sak sak chu lawmawm a tih thu a sawi a, tha nia an hriat an rawtna hrang hrangte dawhthei taka an ngaih thlak sak thin avang leh a tul ang zela hma an lak thin avangin PWD thawktute a fak a ni.

District Agriculture Building thar hawnna ah hian Pu Lalrammawia, Addl. Secretary Agriculture Department, Dr. Saithantluanga, Jt. Director Agriculture Department leh Officer pawimawh dangten Minister hi an rawn tawiawm a, Serchhip Bawrhsap Dr. Lalrozama, IAS, SP Pu Lalringdika, MPS leh District Officer engemawzatin an telpui a ni.