Vawiin hian Home Minister Pu R. Lalzirliana chuan Thenzawl Police Training School a 66th Batch Recruited Police Passing –Out Parade ah khuallian niin Police training chhuakte chibai a chhang let a, Aizawl City Police atana lak thar Police hlei tling tak takte chu Aizawl mipuiten an nghah hlelh tawh thu a hrilh.

Minister chuan, thalai hlei tling tak tak mi 64 ten thla 9 chhung zet training hautak tak mai pal tlanga pass out an nei thei chu a lawmpui thu a sawi a, en mai pawha taksa fit leh inthazo tak in ni tih a hriat a, in hnathawh turah pawh chhawr nahawm tak in nih ka beisei tak zet a ni, a ti. Police te chu ram ralmuanna vawngtu an nih avangin ram enkawltu dik tak an ni a, an pawimawhna hi chapo pui nan leh midangte rahbeh nana hmang lovin ram tan, mipui tan an hmang tur a ni. Chuvang chuan vawiina Pass-out sipai, a bik takin Aizawl District Executive Force (Aizawl City Police) te phei chu Aizawl mipuiten an nghak hlel tawh che u a, i venna hnuaia nun ralmuang zawk neih an chak a ni, tiin Police training chhuakte chu a fuih a ni. Police puitling ni tura an thutiamte chu hre renga, nungchang mawi, huaisenna, thuawihna, tumruhna leh hotute zahthiamna tlachham lo tura ngenin a thei leh tlin te tan kaisan zelna tur tha tak a awm thu a hrilh a ni.

Minister hian an training laia kawng hrang hranga a ti tha berte lawmman (Gold Medal) hlanna a nei nghal a, Chief Minister Running Trophy of Proficiency in Drill ah Constable R. Malsawmkima, Home Minister Running Trophy of Proficiency in Legal Study ah Constable Vanlalbiakdika, Chief Secretary Running Trophy of Proficiency in Shooting ah Constable Emmanuel Malsawmzuala, DGP Running Trophy of Proficiency in General Studies ah Constable Zoramthanga, Addl. DGP Running Trophy of Proficiency in Weapons ah Constable Zoramthanga, IGP Running Trophy of Proficiency in Physical Training ah Constable PC Lalmuansanga, Principal PTS Exemplary Conducts ah Constable Zoramthanga, Governor Running Trophy Gold Medal for All round Best ah Constable Zoramthanga ten Gold Medal hi an dawng a, Medal latute hi Aizawl District Executive Force a mite vek an ni.

He hunah hian Mizoram DGP Pu Lalthianghlima Pachuau pawhin thu sawiin feet 6 chin chung lam mi 60 ten Police Training hau tak tak mai tluang taka an paltlang thei chu lawmawm a tih thu a sawi a. Police a tlin hi a harsa em em a, trainining tha taka paltlang hi a harsa lehzual a ni. Chuvang chuan vawiina Police training chhuakte ka chhuang che u a, ram tan tangkai takin hna inthawkin in hmazawna tih tur awm apiang in hlen zel ang tih ka beisei tiin training chhuakte a chah a. Tha taka hnathawka Promotion hmu zel tura bei turin a fuih a ni.

Vawiina Passing Out Police te hian Pu Lalbiaktluanga, MPS, Principal PTS kaihhruaiin Police puitling ni tura thutiam a nei a, Parade mawi tak nen thla 9 chhung zet Police nunkawng tinreng an zirna hmun hi an chhuah san a, chumi hnuah an puala buatsaih chhun chaw tuihnai tak chu Minister leh Police hotute, training chhuak leh Passing-out Parade rawn hmanpui an chhungte, leh sawm bik mi thahnem takin an kil zui nghal a ni. Vawiina Pass –out Police te hi an vain mi 64 an ni a, an zinga mi 60 te hi Aizawl District Executive Force (Aizawl City Police) atana lakte niin feet 6 leh a chung lam thiau an ni a, mi dang pali te hi CID Security Branch atangin 2, MPRO atangin 1 leh 5th IR Battalion atangin 1 an ni.

He Passing Out Parade ah hian Mizoram sawrkara Police hotu lian engemawzat an tel a ni.