1866/2026-2027

Aizawl, 19 August 2026: Vawiin khan Aizawl Smart City Ltd. (ASCL) hnuaia sak 'Zo Hall', Chaltlanga mi chu Urban Development & Poverty Alleviation (UD&PA) Department Minister Pu K. Sapdanga’n khuallian niin a hawng. He hunah hian Tourism Department Minister Pu Lalnghinglova Hmar chu khualzahawm a ni.

Hawnna inkhawm buatsaihah khuallian Pu K. Sapdanga chuan thu sawiin, India ram pawhin ram changkangte tihdan zuiin, project lian thamte chu sum thawk chhuak thei tura siam a ngaipawimawh hle a ni, a ti.  Zo Hall hian sum tam tak a thawhchhuah beisei a nih bakah, tualchhung mipuite tan tourism kaltlanga sum lakluh tihpunna hmanrua leh sawrkar hlawhtlinna tehfung pawimawh tak a nih a beisei thu a sawi bawk. Pu K. Sapdanga chuan Tourism Department-chu ṭangkai taka Zo Hall hmang chhunzawm zel turin duhsakna a hlan nghal bawk a ni.

Khualzahawm Pu Lalnghinglova Hmar pawhin thu sawiin, Zo Hall hi Tourism Department hnuaia program hrang hrang huaihawt nan a zahpuiawm lo mai ni lovin, a chhuanawm em em a, hmang ṭangkai thei zawk tur anga min ngaih avangin ASCL ten kan enkawl turin min pe a, kan lawm hle a ni, a ti. 

Zo Hall hi Urban Development & Poverty Alleviation (UD&PA) Department hnuaia Aizawl Smart City Mission hmalakna pakhat niin, Aizawl Smart City Ltd. (ASCL) ten an sak zawh hnuah Tourism Department kutah an enkawl zui tura hlan a ni. Zo Hall, Chaltlang hi cheng 18,92,93,390/- senga sak a ni a. Zo Hall-ah hian hmanraw pawimawh leh hmunhma pawimawh tak tak a hnuaia tarlan ang hian dah a ni:

1. Auditorium: Mi 292 lenna a ni a, arm chair 281 bakah sofa 4 (3-seater pathum leh 2-seater pakhat) dah a ni.
2. Stage & Sound System: Automatic Projector, automatic curtain, lighting leh sound system changtlung tak dah niin, mipa leh hmeichhe inthlakna tur Green Room hran ve ve siam a ni.
3. Parking: Basement-1 leh Basement-2 ah lirthei dahna tur siam niin, 4-wheeler 29 leh 2-wheeler 32 a leng.
4. Quarters: Type III (82 m²) pakhat, Type II (59 m² ) pakhat, leh Type I (59 m²) 6 awmin, staff quarters 8 a awm.
5. Facilities dangte: Tui dahkhawlna (Water Reservoir) Litre Nuai 1.2 dawng, Lobby, Cafeteria leh Gallery-ah mipa leh hmeichhe inthiarna (Washroom) changtlung tak siam a ni.

Hawnna inkhawm hi UD&PA Department Commissioner & Secretary, Pu V. Lalsangliana’n a kaihruai a. ASCL CEO Pu CC. Lalchhuangkima hnen aṭangin Technical Report ngaihthlak a nih hnuah Aizawl Smart City Ltd. CEO leh Tourism Department aiawhten hmunhma inhlanna (handover) an nei chhunzawm a ni.