3231/2024-2025

AIZAWL; the 27^th November,2024: Vawiin chawhnu dar 12:15 khan UD&PA Minister Pu K.Sapdanga hovin AMC hnenah Bawlhlawh Paih Motor(Truck) 20 hlanna leh “Tripartite Agreement on Construction of Material Recovery Facility Centre at Luangmual” signing Programme hman a ni.  Hei hi Aizawl Municipal Corporation, UD&PA leh Smart City tangkawp hmalakna Faina Hmathlir ‘Comprehensive Plan for Municipal Waste in Aizawl’ hnuaiah hmalakna a ni. Tripartite Agreement hi Aizawl Municipal Corporation (AMC), Aizawl Smart City Ltd. leh NEPRA Resource Management Pvt. te inkara sign niin, AMC aiawh Pu Joseph H.Lalramsanga, Municipal Commissioner, ASCL aiawh Pu CC. Lalchhuangkima, Chief Executive Officer, ASCL leh Pu Sandeep Patel,  Co-founder & CEO NEPRA ten an sign a ni.

He Bawlhhlawh paih motor hlanna leh Tripartite Agreement signing programme hi MINECO Junction a neih niin, programme hi Pu Lalmalsawma Pachuau, Secretary, UD&PA Department in kaihhruai a ni.

UD&PA Minister Pu K.Sapdanga chuan thu sawiin, Aizawl khawpui a fai lo hian AMC mawh a ni lova,a mipui cheng te mawh a ni. Engtin nge mipui ten an khawpui an vawn fai ang tih a kan sawiho hnuah, vawn fai kawnga an mawhphurhna an hlenna tur hmanrua tangkai ni turin  bawlhhlawh paih Motor hi Smart City in AMC kutah a hlan a ni. UD&PA, AMC leh Smart City te hi mipui ten an chenna khawpui an vawnfai theih nan kan inchhawpchhuak a, amah erawh chu mipui ten an tih tur an tih ve chauh vin hlawhtlinna kan hmu ang. Chhungkaw tin ten bawlhhlawh thliar hran leh paih chungchangah tan i la thar zual zel ang u, tiin Aizawl khawpui mipui te a ngen a ni.

Pu Lalrinenga Sailo, Mayor, AMC pawhin thu sawina hun  hmangin, Smart City in Bawlhhlawh paih motor AMC hnena a hlan chu lawmawm a ti thu a sawi a. AMC in bawlhhlawh kan lak khawm hian  Local Council chak leh chak lo te, veng changkang leh kang lo  te a hriat hle a ni, a ti.  Local council chak leh veng changkangah chuan tawih thei leh tawih thei lo an lo thliarfel vek thin a ni. AMC in kan tih chu bawlhhlawh lakkhawm a ni a, a thliarhran erawh mipui chan a ni. Chuvangin Aizawl khawpui vawngfai tura  sawrkar in theitawp chhuaha a hmalakna te hi a hlawhtlin leh tlin lo chu mipui kutah a innghat a ni, a ti.

Pu CC. Lalchhuangkima, Chief Executive Officer, ASCL chuan Techinical report peiin, Oct ni 11,2024 khan Vaivakawn YMA Auditorium Cum Cultural Centre-ah Faina Hmathlir ‘Comprehensive Plan for Municipal Waste in Aizawl’ programme chu Minister hovin Local Council hrang hrang leh Department hotute nen hman a lo ni tawh a. Hemi bawhzui hian veng hrang hrangah Waste Segregation chungchang campaign kalpui a ni tawh bawk. Smart city hnuaia truck 20 te hi tawih thei bawlhhlawh phur thei tur bika duan niin, tui put chhuak theilo ‘leak proof’ vek an ni.

‘Material Recovery Facility Centre’ project atan hian NEPRA Resource Management Pvt. Ltd., Ahmedabad, Gujarat leh JN Buildcon, Aizawl, Mizoram te thlan niin Smart city hian funding tumin contractor te hian a hmunhma sak leh enkawl zui hna an thawk dawn a . AMC in bawlhhlawh lakkhawm a tum vet hung ang. Facility Centre awmna hmun hi AMC ram a  ni bawk. ‘Material Recovery Facility Centre’ project hi agreement sign atanga thla 12 chhunga zawh fel tur a ni. NEPRA Resources Managenment Pvt.hian Indore,Pune, ,Bengaluru,Jamnagar leh Ahmedabad-ah te hlawhtling takin hna an lo thawk tawh a.Aizalw khawpui tana an thawh turah hian AI technology thar ber te install tel a ni dawn bawk. Material Recovery Facility Centre sak tur hi cheng vaibelchhe ₹ 25,17,16,180/-senga sak tur niin, thla 12 chhunga sak zawh tur a ni a, Nikhata  bawlhlawh a sawngbawl theih tur zat hi  75 tonne a ni.

Pi Zarzokimi, Joint Secretary, UD&PA Department chuan  lawmthu sawiin, vawiin programme hi a khar ta a ni. Programme hman zawhah hian Minister chuan Bawlhhlawh Paih motor te chu a vailiam nghal a ni.