2655/2025-2026

Aizawl: the 15th December,2025: Tukin zingkarah khan UD& PA Minister Pu K.Sapdanga chuan Aizawl Civil Hospital Civil Hospital in a mamawh em em Anesthesia Workstation ,cheng nuai ₹ 35.70 man leh Upper Gastrointestinal Video Endoscope Unit ,cheng nuai ₹ 22 man te a hlan.

He hunah hian thu sawiin, Pu Sapa chuan Health department, a bik takin Civil Hospital  chu an mahni ngaihtuaha vei em emtu Minister an neih chu an vannei hle  a ni tiin, Health services hi a vei em em a, ngaihthlak ninawm khawpin  Health department chungchang hi thin a ni, a ti. Pu Sapa chuan hun reilo te chhunga Hospital establishment hrang hrang kan han fan atang ringawt pawh khan, khawl leh thawktute inbuai zia leh indaih lozia chu kan hmu a. Heti chung pawh hian sawiselna leh demna chu department dang zawng ai pawhin in dawng hnem  thin mai thei. Sawiselna leh demna in dawn chang pawhin, lunghnur mai lo ula, in hnathawh ropui zia te, nunna hlutzia te leh inthlahdah zeuh pawi thui zia hre rengin, chhel takin, hmangaihna leh lainatna rilru nen missionary rilru puin lo thawk zel turin ka ngen che u a. In thawhrimna leh inpumpekna pawh  Aizawl Smart City Limited hotuten an hmu reng a, in tan hian an inhawng viau a ni, a ti.

Health Minister Pi Rinpuii pawhin thu sawiin, Aizawl Smart City Limited in Civil Hospitala khawl min pek te an bunna hmun te kan han fankual khan a tangkai zia chu kan hmu vek a. MRI khawl ringawt pawhin June  thla atang khan mi 1300 an en tawh a ni.  Khawl thar chang kang tak tak kan nei hian a thawktu te pawh a tiphur thar hle a ni tiin, UD&PA Minster leh Staff te, Aizawl Smart City limited hotute  chungah lawmthu  sawiin, Health Department  a thawktu zawng zawng te hnenah pawh lawmthu a sawi  bawk.

He khawl hlanna inkhawm tawi hi Doctors’ Seminar room-ah buatsaih niin, Pu Lalmalsawma Pachuau, Secretary,UD&PA Dept chuan programme kaihruai a. Pu K.Sapdanga chuan  Health Minister Pi Lalrinpuii hnenah Memorandum 0f Agreement for Anesthesia Work Station and Upper GE Scope  chu a hlan ta a ni.  UD& PA hian Smart City Limited kaltlangin  Aizawl Civil Hospital  hnenah  cheng nuai ₹872  man MRI khawl  leh khawl dang 24  avaiin cheng vaibelchhe ₹20.8 man kumin June thla khan a lo hlan leh tawh bawk a ni.

Anesthesia Workstation (Drager Atlan A100), hnimhlum khawl hi  Renal Replacement surgery (kal thlakna) atana duan bik a ni a.He  khawl  hmang hian damlo te him zawkin hnimhlum  a pek thei tawh  dawn a. Mizorama nimhlum khawl kan neih tawhah chuan atha ber a ni hial ang. A khawl hi ni 15/11/2025 khan Civil Hospital alo thleng a, ni 3/12/2025 khan installation tihfel a ni a. Mithiam te lokalin, Demonstration pawh ni  5/12/2025 khan lo neih tawh a ni bawk.  Nakum January  khian Drager 'application specialist' alokal leh anga, a khawl tangkai zawka hman dan tur 'demo' an rawn neihpui leh  dawn a. Mizoramah ngei kal thlak theih a nih hun tur hi a hla tawh lo hle a ni.

Minister pahnih, Pu K.Sapdanga leh Pi Lalrinpuii hian khawl hlanna hun a hman hma hian  Aizawl Smart City Limited in Aizawl Civil Hospital hnena kumin June thlaa MRI leh khawl dang chi hrnag 24  an lo pek tawh te chu, a hunna hmun heng: MRI room, RD&I Dept., Cardiology, Surgery OT & SICU, Eye OT,Endoscopy, Bronchoscopy, SNCU, Gynae OT leh Pathology Dept.-ah te hian kalin an hman dan leh mipuiin an tangkaipui dan a thawktu hnenah an zawt bawk a ni.

Vawiin khawl thar inhlanna prohramme-ah hian UD&PA Minister hi Health Minister  Pi Lalrinpuii bakah Pu Lalmalsawma Pachuau, Secretary,UD&PA Dept., Pu CC.Lalchhuangkima,Chief Executive Officer,Aizawl Smart City Limited leh Civil Hospital-a  official ten an tawiawm a ni.

Dr. Lalchhuankimi, Sr. Medical Superintendent, Civil Hospital, Aizawl chuan  lawmthu sawiin, vawiin programme hi a khar ta a ni.