Nimin chawhnu khan ni li chhung awh Umang Festival, Multipurpose Cultural Complex Berawtlanga neih chu Lunglei High Powered Committee Vice Chairman Pu Joseph Lalhimpuia’n a khar. He festival hi rualbanlo te tan, Ministry of Culture thuchhuak angin Art &Culture Department hian a buatsaih a ni.

Kharna inkhawmah hian thu sawiin Pu Joseph Lalhimpuia chuan khawvela mi vannei ber te chu hausa leh sum ngah, duh duh nei thei te ni lovin mi hlim thei te hi an ni, a ti. Umang festival hmangtute chu midang tam tak angin hmuhtheihna, ri hriatna, duhna hmun apianga kal theihnate nei lo mahse engkim siamtu leh enkawltu Pathian chuan a hre renga, an chanvo tur a buatsaihsak tih hre turin a chah a. Mi ropui leh vannei ber anga lang, mihausa leh sum ngah te pawh nun beidawnga mahni intihlum ta tam tak an awm a, chuvangin harsatnaah pawh beiseina eng nei tlat mi te hi mi vannei an ni, a ti. Pu Joseph Lalhimpuia chuan Umang Festival buatsaihtute leh anmahni kaihruaitu zirtute inpekna a fak a, ringtute tihtura Pathianin a ruat midangte tana rawngbawlsak chu a takin an nunpui a ni, a ti a. Hlawh sang zawk leh hna nuam zawk an thawh theih laia pianphung leh rilrua danglamna nei te enkawl tura an inpekna hi a chhuanawmin a zahawm takzet a ni, Lunglei HPC Vice Chairman chuan a ti bawk.

Umang Festival chhim tur hian School paruk an tel a, chungte chu Onyx School, Lunglei; Shalom Special School, Serchhip; Integrated Blind School, Kolasib; Special Blind School, Durtlang; Moriah Blind School, Luangmual leh Gilead Special School, Falkland te an ni a. Anmahni kaihruaitu leh zirlai he camp-a riaklut zawng zawng hi mi 51 an ni. Camp-ah hian hnam lam te leh rose leh wreathsiamte naupang te hian an zir.

Umang Festival kharna inkhawm hi Art &Culture Director Pu Ngurbiaka’n a kaihruai a, Camp Director Pu F Lalthanmawia’n report pe in Art &Culture Jt. Director Pu R.Hmingthanzuala’n lawmthu sawiin hun hnung a khar a ni.