Kut hnathawktute thar chhuah hmanga sumdawnna lam buaipui turin Joint UN Intiative Project hnuaiah Marketing Task Force din tum a ni a. Hemi chungchanga hma lakna tur chungchangah vawiin khan Chief Secretary Pu Lalmalsawma hovin NLUP Implementing Board hotute, UNIDO leh UNDP official te, department pawimawh hotu liante chu Chief Secretary Conference room-ah an thu khawm.

He meeting ah hian Pu Sandeep Tandon, National Expert on Sustainable Energy for all, UNIDO leh Pu Sanjeev Gupta, UNDP Consultant ten UN Joint Initiative hnuaia hun eng emaw chen Mizoram kut hnathawktute dinhmun an zir chianna atanga hma lakna tur pawimawh nia an hmuh te an sawi a. Kut hnathawktute eizawnna chawikang a, an thar chhuah hmanga Mizoram tan sumdawnna hlawk leh ngelnghet din turin a buaipuitu Marketing Task Force din an rawt chu Chief Secretary hova department hrang hrang hotuten an sawi ho hnu in tha an ti tlang a. Trade & Commerce Department bul tumin Marketing Task Force chuan Mizoram thil thar chhuah hmanga sumdawnna kawng dap leh kut hnathawktute kawng kawh hmuh hna a thlur bing dawn a ni.