UN Agency 4 - UNDP, UNIDO, FAO leh ILO aiawh te chuan UN Joint Initiative Project hnuaia ruahmanna buaipuiin kar hnih zet Mizoram an chamchilh hnuah vawiin khan UNDP leh FAO aiawh ten Dr. C.Vanlalramsanga IES, Secretary, Planning & Programme Implemention Department hovin NLUP Implementing Board(NIB) conference hall ah Planning Department leh NIB offcial te nen an ruahmanna siamte thlir hovin hmalakna tur pawimawh te an sawi ho.
UN Agency hrang hrang aiawh te hian Mizoram an cham chhungin Aizawl, Serchhip leh Champhai district a khaw hrang hrang an tlawh kual a. Ranvulh leh kuthna thawka eizawng mi thahnem tak kawmin an hmalakna hmun te an tlawh bakah an eizawnna leh khawtlang dinhmun zirchianna an nei a. An cham chhung hian sorkar department pawimawh te meeting an neihpui bakah NGO leh Kohhran hmeichhia te, MZU a mithiam te pawh an kawm kual bawk a ni.
Vawiina Planning Department hotute nen a hmawrbawkna meeting an neihah UNDP leh FAO aiawh te chuan Mizoram an cham chhunga an thil hmuh dan tlangpui report an pe a. UN Joint Initiative Project hnuaia hmalakna turah vawk vulh, Agro-Horticulture thlai leh Mau chin eizawnna tih hmasawnna tur leh hemi kawnga UN Agency 2 te tangkaina theihna turte an tarlang a. Vawiin vek hian Chief Secretary Pu Lalmalsawma IAS chu a office ah hmuin an hmalakna te an sawipui bawk a ni.
