UN Agency pali – Food & Agriculture Organization (FAO); United Nations Development Programme (UNDP); United Nation Industrial Development Organization (UNIDO) leh International Labour Organization (ILO) aiawhte telna, UN Mission Technical Team chuan vawiin chawhma khan Mizorama kut hnathawktu pawl hrang hrang aiawhte NLUP Conference Room-ah an kawm.

He meeting NLUP Implementing Board Vice Chairman Pu PL Thanga, IAS (Retd) kaihhruaiah hian ZOHANCO, ZOHANFED, CDAR, MULCO, MAMCO, AMFU, Bamboo Development Agency, Zopar Exports Pvt. Ltd., Mizoram Bamboo Industries Association, Mizoram Iskut Growers’ Association, Mizoram Skill Development Board leh Women Commission aiawhte an tel a ni.

Meeting ah hian heng pawl aiawhte chuan an pawl hnathawh tlangpui, an pawl kalphung, an thil siam leh deh chhuah chanchin te, harsatna hrang hrang an neih dan te, an pawl kal zelna turah ruahmanna tha nia an hriat te chu chipchiar takin an sawi a. UN Mission Technical Team chuan pawl hrang hrang sawina eng atangin Mizoram in kawng hrang hranga hma a sawn theih nan thawhhona leh ruahmanna tha Mizoram leh Mizoram mipuite tan an duang chhuak dawn a ni, an ti.

Chawhnu lamah UN Mission Technical Team hian Mizorama tlawmngai pawl hrang hrang – Central YMA, MHIP, MUP, Mizoram Chamber of Industries leh Mizoram Chamber of Commerce aiawhte nen a hmun ngai-ah inkawm hona tha tak an nei leh nghal a ni.

UN Mission Technical Team hian naktuk leh naktip khian Kolasib leh Lunglei tlawhin NLUP hnuaia hmalakna hrang hrang te an tlawh anga, pawl thenkhat hmalakna te an en bawk dawn a ni.