Mizoram rawn tlawh mek UN Mission technical Team-te chuan Aizawl bakah Serchhip leh Lunglei District-te pawh an tlawh a, nimin khan Lunglei lutin Lunglei Circuit House Conference Hall-ah sorkar officials bakah tlawmngai pawl aiawhte, zirna lama hnarkaitute leh khawtlang hruaitute nen meeting an nei a ni.

Lunglei DC Pu Asish Madhaorao More chuan meeting kaihruaiin UN Team ten Lunglei tlawh a, Lunglei khawpui leh mipuite hmasawnna tur ruahmanna siam an tum chu a vanneih thlak hle a ni, a ti. Pu Ashish More-in UN Team-te chu an thil tum leh lo kal chhan sawizau tura a sawm angin an Team Leader Pu Sandeep Tandon (UNIDO) chuan UNO-in India ramchhunga state 3-ah hmalak a tum thu a sawi a, chung zingah chuan Mizoram State-ah hnathawh an tan hmasak ber tur thu a sawi bawk. Mizoramah an hmalak dan tur kawng hrang hrang an rawn zirin an rawn finfiah hmasa a ni tih sawiin Pu Tandon chuan state hrang hrangte chu an mamawh a inang lo ang bawkin Mizoram tan pawhin a bik taka Mizo mipuite hlawkpui dan tur kawng an dap a ni dawn, a ti.

Pu Sandeep Tandon bakah Pi Manjula Bhuyan (UNIDO), Pi Antonia Paliwal (FAO), Pi Kalpana Tawakley (UNDP) leh Pu Sanjeev Kumar Gupta (UNDP) te pawhin thu sawiin Mizoram boruak, sik leh sa, leilung hausakna, thing leh mau, kawlphetha tihchangtlun, themthiamna lam, khualzinte hipna tur hmalakna leh khawtlang inrelbawl dan te chu zau taka an thlir tur a ni tih an sawi a. Khawvel boruak, sik leh sa (climatic change) thleng nasa lutuk thlir reng chungin Mizote lo neih dan leh thing leh mau tichereu lo zawnga hmalak an tum thu an sawi a. UN Programme-in a tum ber chu mipuite “ei leh bar, eizawnna leh environment humhalhsak” (food, livelihood, environmental security) a ni tiin UN Team Member-te chuan a bik takin hmeichhiate chawikan leh hmasawnna kawng engkimah tel tir an tum thu an sawi bawk a ni.

He meeting-a tel Agriculture, Horticulture, Environment & Forests bakah NLUP Line Departments officials te chuan Lunglei District chhunga an hmalakna hrang hrang an tarlang bawk a. An hlawhtlinna leh an harsatna tawhte chipchiar takin sawihovin UN Team-te chuan theihtawp an chhuahpui tur thu an hrilh a ni. Mizote lo neih dan (jhumming) chu tihrem theih a nih loh pawhin tihtlem dan tur kawng dappui an tum thu an sawi bawk a ni.

UN Mission Technical Team-te chuan Mizoram Polytechnic, Lunglei pawh a hmunah tlawhin Polytechic Principal charge la mek tu Pu B.Lalhmuakluai leh zirtirtu dang ten lo hmuakin, Polytechnic-a zirna tihhmasawn dan tur leh an zirlai zirchhuakte tana hnazawnna lama harsatna sutkianpui dan turte pawh an sawiho a ni. UN Team chuan Thaizawl-a Soil & Water Conservation Department enkawl lai Coffee Plantation hmun pawh an tlawh nghal a, Mizoram-a coffee a tha duh hle tih an hriatin tun aia tihchangtlung zawk dan tur a hnathawkte nen an sawiho bawk a ni.

UN Technical Team te chuan tukin zing dar 8:00 khan Lunglei chhuahsanin Aizawl lam an pan nghal a ni.