Vawiin chawhma dar 11:00Am khan Chief Minister Pu Lalthanhawla chuan MADC complex-ah tuna MADC sorkarna kalpui mek ten kumhnih(2) an tlin lawmna programme an buatsaih chu a hmanpui. He kumhnih (2) tlin lawmna programme hi Pu LC. Chakhai, MADC Chairman-in inchawnglawmna thusawiin, Rev. P.Riabi Sr.Executive Secretary, ECM kohhran chuan hunserh a hmang.
He lawmna programme-ah hian chhimlam fanga thang mek Pu Lalthanhawla chuan thusawiin, mipui ten an tawiawm loh chuan sorkar hian ram hmasawnna kawng sial tur leh a chhelaite siamtha turin a mah chauhvin a kal thei lo va. Chuvangin Mara ram mipuite chu Mara ram tih hmasawn tur leh a chhelaite siamtha turin rinawmna, taimakna leh Pathian tihna nena; eng party nge sawrkarna siam tih-ah buai lo va, MADC sawrkar chu tawiawm tlat thin turin a sawm. CM Pu Hawla chuan tunlai EVM kaihhnawi thuthang lengvel chungchang sawiin, Dawt hian ke a nei lo va, reilote-ah a tlu leh mai thin a ni, a ti.
CM Pu Lalthanhawl chuan Chhim lamah kan awm vang emaw; Hmar lama kan awm vang emaw hian; ram kilkhawra awm anga inngaihna rilru kan pu tur a ni lova. Mizoram neihtu kan nihna adang chuang lo va, kan chanvo leh mawhphurna pawh a in ang vek a ni, a ti. CM Pu Lalthanhawla chuan sawi zelin, Mizoram kristian te hian missionary hna hi mihring chungah chauh emaw thawh tur ka ti thin a. Tunah chuan Pathian “thilsiam”dang heng ramsa, sava leh luisa, thing leh mau leh ramngawte chungah hian kan missionary a tul tawh tak zet a ni. Chutilo chuan reilote-ah kan ramngaw te hi an chereu-in; kan luisa, sava leh rams ate hi an thih mang vek mai dawn a ni, a ti.
He lawmna programme-ah hian Pu R.T Zachono, CEM MADC pawhin thusawiin, tun kum hnih chhunga sawrkar hmalakna hrang hrangte a tarlang a, Mara ram mipuiten pa anga kan en kan CM in hun chep tak kara min tlawh hi a lawmawm tak zet a ni, a ti bawk.
Chief Minister hian nimin khan Myanmar ram chhung Salachhuah khuaa a kal tumin Lawngtlai a chhuahsana, mahse khua in a bumro tak avangin Salachhuah hi thleng lovin Vahaiah a tawp rih a, Vahaiah hian khawtlang mipui ten ropui taka lo lawmin an lo hmuak a ni. Khuain a zir a nih chuan thawhtanni lo awm turah hianMyanmar ram chhung tho Vuangtu panin a chhuak ang.
Salachhuah leh Vuangtu khuate leh an chhehvel mipui tangrualten Chief Minister hi chawimawina hlan an tum a, chumi hun hmanpui tur chuan Chief Minister hian heng khaw pahnihte hi tlawh a tum a ni.
