Finance Minister leh Taxation Department changtu ni bawk Pu Lalsawta chuan May 8 leh 9 khan Kolasib District Taxation Office leh Vairengte-a Department hrang hrang Check Gate 8 te chu a hmunah a tlawh. Minister hi Parliamentary Secretary leh bialtu MLA ni bawk Pu K Lalrinthanga, Parliamentary Secretary Pu K S Thanga, Commissioner of Taxes Pu Lalthangliana Varte leh sawrkar mi pawimawh dangten an tawiawm.

Finance Minister Pu Lalsawta chuan heng hmuna hnathawktute hnathawh leh hmalaknate enpuiin an mamawh leh an harsatnate chipchiar takin a zawt a, Sawrkar tan theitawp chhuah a hna thawk zel turin a fuih a, rim taka an thawhnaah lawmthu a hrilh bawk.

Sawrkar kum 2014 – 2015 aTaxation Department Revenue Target chu vaibelchhe 225 anih thusawiin, kum hmasa lama sum bituk an khum thin angin kumin pawh hian target khum leh ngei tura tan la turin Taxation Department hnathawk te chu a fuih. Plan Budget atanga za zelah sawm Mizoram Sawrkar in a tum ve tur kan hmu pha lova, chuvangin chhiah hi a bo a bang awm lova pek hi mipui mawhphurna a ni tiin chhiah petu ten rilru dik tak pua kan pek a ngai a ni, a ti bawk.

Plan Budget-a kan sum tum tur za zelah sawm hi kan chhun luh theih loh chuan leiba inchhek khawl (debt liability) a sang tial tial a, hei hian hmasawnna kawnga hmalak zelna tur a tithuanawp a ni.

Finance Minister chuan Mizoram state sum inrelbawlna (fiscal discipline) chu tha zawka a kal theihna turin a theih anga hma la in, ruahhmanna te pawh siam chhoh mek zel a ni a, hemi thilah hian Sawrkar hnathawk ten mawhphurna sang tak kan nei theuh a ni tih hriat hi a pawimawh hle ani, a ti.

Sawrkar kum kalta April 2013 – March 2014 chhunga Vairengte Check Gate atanga bungraw phurh luh hlut zawng chu vaibelchhe 3705 vel niin, heng atanga dik taka chhiah pek anih chuan Taxation Department hian Revenue Budget hi an khum ngei tura beisei a ni.