Vawiin khan UNO Technical Mission Team mi 7 (Pasarih) te chuan Aizawl an lo thleng.

UN Team te hi Agency pali atanga lo kal an ni a, Dr Peter Kenmore, (FAO) chuan rawn hovin, Dr. M.S.Antonio Paliwal (FAO), Dr. AB Negi (FAO) Pu Paul Comyn (ILO), Anjana Chellani (ILO), Ms Kalpana Tuwakley (UNDP), Pu Sanjeev Kumar Gupta (UNDP), leh Pu Sandeep Tandon (UNIDO) te an ni a, vawiin tlai dar 3 khan Mizoram tana hmalak dan tur department mi pawimawh te nen Chief Secretary, Pi L.Tochhong hovin, Secretariat Conference Hall-ah an nei nghal a ni.

He meeting pawimawhah hian NLUP Lines Department pakua te bakah Labour & Employment, Rural Development, Social Welfare, Trade & Commerce leh PWD te an tel a ni. UNO Team leh Mizoram sorkar hotute hian Mizoram sorkarin hma a lak tawh leh lak mekah harsatna enge a tawh, chu chu engtia chinfel chi nge, supply inputs leh market lama harsatna sutkian dan turte bakah, Mizoram-a hma lakna tha tur te an sawiho a ni.

UNO Team hian chipchiar zawka hmalak dan tur sawiho leh turin naktuk chawhma dar 9 : 30-ah NLUP Implementing Board (N/B) Conference Hall-ah meeting an neihpui leh dawn a, hetah hian UN Agency 4 te bakah Agriculture, Horticulture, Environment & Forest, Fishery, Industry leh Sericulture Department te an tel ang.

Naktuk chawhma dar 10 : 00 ah Central Agriculture University, Selesih-ah. AH & Vety bik tan meeting an neih pui bawk ang. Chawhnu dar 1 : 00-ah Principal Secretary, Labour & Employment Office Chamber-ah, Labour & Employment, Rural Development, Youth Commission Department ten ILO leh UNDP te meeting an neih pui ang a, tlai lam dar 4 : 00-ah Engineer-in-Chief, PWD Office Chamber-ah ILO te hian meeting an neihpui leh ang.

Naktuk dar 5 : 00 PM hian Chief Minister, Pu Lal Thanhawl chu a Bungalow ah an hmu ang.

Zanin dar 7 : 00 PM hian Welcome Dinner-cum-Cultural Programme, Pu H.Liansailova, Vice Chairman, Mizoram State planning Board buatsaih sak chu State Guest house-ah UN Team te nen hian an hmang ang.