Mizoram nena thawk ho tura ruahmanna siam tu tur UN Technical Team te chuan chawlhkar khat chuang an cham hnu in vawiin ni 13.5.2014, khan State Guest House Conference Room ah Pu P.L Thanga kaihhruaina in sawihona hnuhnung ber (wrap-up meeting) chu an nei.
Heng UN peng pawimawh UNIDO, FAO, UNDP leh ILO aiawhte bakah State Sorkar aiawh Planning, Forest, Agriculture, industry leh a dangte aiawh in officer lian an tel a. UN Technical Team member te hian Department leh organization pawimawh chi hrang hrangte aiawh bakah district 5 an tlawh a. Thingtlang leh khawpuia mi hrang hrangte hnathawh dan an zir hnuah an hmuh dan leh hmalakna atana tha-a an ngaihte meeting ah hian presentation an nei a. Sorkar aiawh-a officer awm ho te nen sawihona an neih hnuin vawiin khan Delhi lam panin an hawng leh ta.
UN Technical Team hote hian eizawnna tluantling (livelihood security) te, ei leh bar a intodelhna {food security) te, boruak, sik leh sa leh ram ngaw leh ram hmul humhalhna tha (environment security) te leh kawlphetha lama intodelhna (energy security) te hi UN Agenda an nih angin heng hnuaiah hian Mizoram hmasawnna kal pui dan tur uluk taka ruahmanna siam tha an tih thu leh an tum thu an sawi. Mizoram hausakna hlawkpui tur zawnga development kalphung buatsaih an tum dan an sawi bawk.
Delhi lama UN Agency hrang hranga hotu lian berte nen a rang thei ang bera sawihona neih hnuah Planning Commission leh Central Ministry hrang hrang te nena tangruala Mizoram hmasawnna chak zawka kalpui dan ruahman an duh thu an sawi bawk. Mizoramah an cham chhunga ram hruaitute, Sorkar hnathawkte, social leaders leh organization hrang hrang hruaitute bakah loneitute leh hnathawk tute inpek na ropui an tiin heng te hi hlawhtlinna atana hmanraw tha ber a ni an ti. An chungah lawmthu nasa takin an sawi bawk.
