880/2022-2023

Aizawl, the 12^thJune 2022 : Union Cabinet Minister for Fisheries, Animal Husbandry Shri Parshottam Rupala chuan vawiin khan Central Agricultural University (CAU) hnuaia awm College of Veterinary Sciences & Animal Husbandry, Selesih a PG Boys Hostel II sak thar a hawng a, hemi rualin College of Veterinary Sciences & Animal Husbandry, Jalukie, Peren, Nagaland a Transit Hostel sak thar pawh helai hmun atangin virtually-in a hawng bawk a ni.

Heng Hostel 2 hawnna puala programme, CVSc & AH, Selesih Auditorium a neihah Shri Parshottam Rupala chuan thu sawiin ranvulh chu sumdawnna tha tak, a tuk atang maia sum thawkchhuah thei a nih dante sawiin, ran vulh chu eizawnna tha a ni, a ti a. Tunlai thiamna hmangin Sawrkar Laipui chuan ranvulh chungchang hi ti changkan chhoh zel a tum dante sawiin hlawkzawka mipuiin ran vulh an buapui theih nan Scheme hrang hrang an siam te chu tangkai taka hmang turin ran vulhtute a chah a ni. Ran doctor-te hnathawh chu hna ropui anih dan sawiin mihring te chuan na kan sawi thei mahse ran te chuan na an sawi thei ve lova, chuvangin tawng thei lo te tana hna in thawh hi a ropui a, Pathian rawngbawlna hna ropui in thawk tel a ni, a ti. 

Union Cabinet Minister chuan hripui len hma kum kal tawhah khan Prime Minister Shri Narendra Modi in ran te tana hri danna vaccine programme cheng vaibelchhe 13,000 hu a ruahman te, ran damlo te tana mobile veterinary service a ruahman te chu ranvulhtu ten an tangkaipui hle thu sawiin Mizoram tan pawh hetiang Mobile Ambulance Unit hi 26 ruahman a ni, a ti. Sikkim in organic lamah hming a chher ang bawkin Mizoram a kuthnathawktute leh Sawrkar pawhin hemi kawnga tan la se tia a duh thu sawiin hemi kawnga certification hautak leh sum ngai thin, tih awlsam dan Agriculture Ministry in a ruahman mek a, a khaw zawng emaw, a area zawng emaw a organic certification hi tih tum a ni a, hemi atana fee chawi thin pawh a thlawna tih tum a ni, a ti. 

He programme ah hian CAU Imphal Vice Chancellor Dr. Anupam Mishra leh ICAR New Delhi a, Deputy Director General, Animal Science Dr. B. N, Tripathi te pawh lo telin Union Minister hi an tawiawm a, Tuichawng bialtu MLA Dr. BD Chakma pawh he hunah hian a tel a ni. Union Minister hian CVSc. & AH publication 3 a tlangzarh bawk a ni.

Union Minister hian Community Hall ah kuthnathawk tute leh ran vulhtute nen inkawmna hun tawite an nei a, hetah hian KVK Selesih in heng mite an tanpui dan leh an hlawhtlinna te sawilan a ni.