1904/2022-2023
Aizawl, 13th September, 2022 : Vawiin khan Union Commerce and Industry Minister Piyush Goyal hovin New Delhi-ah Board of Trade meeting neih a ni a, Mizoram sawrkar aiawhin Commerce & Industries Minister Dr R. Lalthangliana a tel.

He hunah hian Commerce & Industries Minister, Mizoram Dr R. Lalthangliana chuan thusawina hun tha tak changin Mizoramin a thar chhuah leh a hralhchhuah theihte bakah Mizoramin India ram thil hralhchhuah hlawknaa a thawh ve theih tur chi hrang hrang a tarlang a. Mizoram chuan Bangladesh leh Myanmar a ri avangin leh heng ram pahnih ri depa chengte nen thui tak thlahtu chhui dun thei kan nih avangin insumdawn tawnna kawngah pawh inrintawnna leh inhriat chian tawnna kan nei sa a ni, a ti a. Mizoram sik leh sa chu lum lutuk lo leh vawt lutuk lo a nih avangin thlai leh theirah tharchhuah kawngah hma eng tak a awm a, a bik takin Agriculture, Horticulture leh Food Processing lamah nasa takin hma kan sawnin kan thang thei a ni a ti. A bik takin thei chi hrang hrang sapthei, serthlum, hatkora, balhla, dragon fruit etc., bakah thlai - sawhthing, aieng leh hmarcha etc., pangpar lamah anthurium, rose etc., ten Mizoram leilung an ngeih avangin tun aia nasa lehzuala chin hi kan hlawkpui dawn bakah India ramin hralhchhuahna tur a neih tam phah dawn a, hetih rual hian thlai leh theirahte thar chhuah a nih hnua sawngbawl zui (post-harvest management) na tur hmanrua leh bungraw tha Mizoramin a neih that tawk loh avangin sawrkar laipui chuan min rawn ngaih pawimawhsak ngei se a duh thu a sawi a ni. Organic Farming Mizoramin a kalpui dan sawifiahin sawrkar laipuiin ruahmanna fel tak a neih theih chuan Mizoram tharchhuahte hi ram changkang zawk, a bik takin Europe leh America, organic farming ngaihsanna ramah hlawkna kan hmu ngei dawn a ni, a ti.

Dr R. Lalthangliana chuan Handloom, Textiles leh Handicrafts chu Agriculture industry dawtah Mizoram mipuite hmalakna lian ber a nih thu sawiin Mizoram kutchhuakte chu tunhma atang tawhin India ram leh ram pawn miten an hlut tawh thin a, hemi kawngah hian nasa lehzuala sawrkar laipuiin hma a lakpuia ruahmanna a siampui phawt chuan thalaite tan eizawnna ngelnghet tam tak a siam dawn bakah India sawrkar pawhin a hlawkna a tel ngei dawn a ni, a ti a. Handloom, Textiles leh Handicrafts tihhmasawnna kawngah sawrkar laipuiin hma laksak ngei turin a ngen bawk a ni.

Mizoram chu mau chi hrang hrangin an ngeih thu tarlangin Dr Thangtea chuan mau hmanga thil siam chi hrang hrang inchhung bungrua atanga thil dangte khawvel pumin a hlut avangin Mizoramah mau tunlai thiamna sang ber hmanga mumal leh changtlung zawka sawngbawl a hlawk hle dawn tih a sawi a, hemi atana ruahmanna felfai tak neih a tul thu a sawi a ni. Silk tharchhuah kawngah Mizoram chuan theihna sang tak a nei tih sawiin Muga silk phei chu Assam leh Mizoramah chiah a thar theih a, Mizoram sik leh sa hian Muga leh Mulberry a ngeih avangin hei hi tun aia ngaih pawimawh ni se a tul tih a sawi bawk.

Heng bakah hian India ramin Bangladesh leh Myanmar nen sumdawnna changtlung zawk an neih theih nan sawrkar laipui hnenah Bangladesh ri lamah Silsuri, Tuipuibari, Marpara leh Nunsuri-ah border haat sa tura a ngen thu sawiin, pilot project atan Mizoram sawrkar chuan Silsuri – Sajek a vauchher thu sawiin Bangladesh sawrkar thu leh hla ngaihchan mek a nih thu a sawi.

Indo – Myanmar border ah Hnahlan, Zote, Vaphai leh Pangkhua ahte border haat siam tura hmalak mek a nih thu leh Bangladesh sawrkar ngaihchan mek a nih thu a sawi bawk.

Kawrpuichhuah Integrated Check Post (Indo-Bangladesh Border) tipuitling tura hmalakna chak lehzual kalpui a pawimawhzia sawiin Dr Thangtea chuan ASEAN ram te nen insumdawntawnna tichak lehzual turin Zokhawthara Land Custom Station chu tihchangtlun a Quality testing leh certification laboratory dah thuai a ngai tih a sawi bawk.

Mizoram leh Sitwe lawngchawlhna (Myanmar) thlungzawmtu Kaldan Multi Modal Transit Transport Project (KMMTTP) chu tluang takin hmalak mek a nih thu sawiin he project hi zawhfel a nih chuan hmarchhak state bakah India ram pumin Myanmar leh ASEAN ram dangte a pawt hnai vek dawn a, sumdawnna leh hlawkna tam tak India ramin a tel thei thuai dawn tih a sawi bawk a ni.

Board of Trade meeting zawh hian Dr R. Lalthangliana hian New Delhi-a Bangladesh High Commission tlawhin an hotu pawimawhte nen border trade chungchang an sawi hova. Silsuri a border haat leh Kawrpuichhuah a ICP din chungchang te, Pu Tipu Munshi, Hon’ble Minister, Ministry of Commerce, Bangladesh-in kumin April thlaa Mizoram a rawn tlawh tuma ramria insumdawn tawnna chungchang thuchhuah intawm (joint statement) an siam tihhlawhtlin dan turte an sawihova, Mizoram Commerce Minister hian Bangladesh sawrkar lam atanga tihtur awm te rang taka tihfel a nih theihnana hma lakpui turin Bangladesh High Commission hi a ngen a ni.

Minister hian Ministry of Commerce a Joint Secretary Krishan Kumar hmu lehin Bangladesh leh Myanmar te nen ramria insumdawntawnna chungchang a sawipui leh a. Dr. R. Lalthangliana hian Bangladesh sawrkar nena hma lak dan thlen chinte hrilhin Myanmar ramri khua te a border haat dinna atana harsatna awm sut kian dan tur chungchang te an sawidun a ni.

Hemi hnu hian Ministry of Mining-a Secretary Alok Tandon kawm lehin National Green Tribunal thuchhuah anga lui atanga balu leh quarry lung lak chungchanga District Survey Report (DSR) leh Environmental Management Plan (EMP) siamtu tur NABET Consultant rawihnana sum an dil chu a bik taka ngaihtuahsak turin a thlen nawn leh a, Mines Secretary hian a tih theih dan tur kawng te an lo enzui tur thu a lo sawi a ni.