2637/2026-2027

Aizawl the October 12, 2026: Vawiin khan Pu Jyotiraditya M. Scindia, Hon’ble Union Minister, Ministry of Development of North Eastern Region (DoNER) chuan Mizoram University Administrative Conference Hall-ah Ashtalakshmi Darshan (Phase-II) programme-a tel mek zirlaite leh Mizoram University zirlaite chu a kawm.

He hunah hian Union DoNER Minister chuan thu a sawi a, Department of Development of North Eastern Region (DoNER) chu Prime Minister hmasa, Atal Bihari Vajpayee hun laiin kum 2001 khan din a ni a, Mizoram University nen an din kum inangin hei hian inkungkaihna pawimawh tak an nei nia a hriat thu a sawi. Mizoram University-ah hian department 39, school of study 10 leh affiliated college 39 a awm tawh a ni tih tarlangin, kum 25 chhunga Mizoram University-in zirna lama hmasawnna ropui tak a hmuhte avangin zirlaite leh zirtirtu chu a lawmpui thu a sawi bawk.

India hmarchhak state-ah te chuan inkalpawhna a tha tawh hle tih a sawi a, hei hian nasa taka hmasawnna rawn thlenin, India ram tithangtu pawimawh ber a nih phah ta a ni, a ti. Mizoramah pawh India ram zalen hnua a vawikhatna atan rel kawng Bairabi–Sairang siam a lo ni ta a, hei hian sumdawnna leh ei leh bar kawngah nasa takin a pui a ni, a ti. Inkalpawhna tha chuan India hmarchhak state te chu India state dangte nen kawng hrang hranga inpawhna leh inkungkaihna tha zawk a siam thu a sawi a, India ram kawng hrang hranga a than theih nan hmarchhak state te chuan chanvo pawimawh tak an neih thu a sawi bawk.

State tin te chu thlai thar lar bik an neih a pawimawh tih sawiin, Union Minister chuan thlai thar te chu sawngbawl, tihlar leh hralh chhuah thlengin a pawimawh a ni, a ti a. Mizoram tan chuan sawhthing chu thlai thar pawimawh ber zinga mi a ni tih sawiin, India ram chhung mai ni lo, ram pawn thlenga hralh chhuah a nih theih nana tan lak a nih thu a sawi. 

Union Minister chuan Mizo hnam nunphung humhalh chu zirlaite mawhphurhna a ni tih sawiin, a bik takin tlawmngaihnate chu chhawm nung zel turin a fuih a. India ram ei leh bara hmasawnna kawngah India hmarchhak state te mawrhphurhna chu a pun zel avangin, zirlaite chu hmasawnna thlen thei hruaitu ni tura chahin, Viksit Bharat 2047 tihlawhtling tura an theihna zawng zawng hmang turin a sawm bawk a ni. 

Ashtalakshmi Darshan Phase-II chungchang hi Dr. R. Lalchhanhima, Dean, Students’ Welfare chuan a sawi zau a, Ashtalakshmi Darshan Youth Exchange Programme hi India Sawrkara Ministry of Development of North Eastern Region (DoNER) hnuaia thalai ten academic session te, cultural programme leh field visit hmanga  India ram thalaitena inlaichinna tha zawk an neih theih nan leh culture hrang hrang inhriat pawh tawnna atana duan a ni. Ashtalakshmi Darshan Youth Exchange Programme hi January 16, 2026 khan Mizoram University-ah hawn a ni. 

 Vawiin inkhawm Dr. Grace Lalhlupuii Sailo, Assistant Professor, Social Welfare Dept., MZU in a kai hruai a, Prof. Dibakar Chandra Deka, Vice Chancellor chuan inlawmna thu sawiin, zirlai naupangte chu Union DoNER Minister nen inkawmhona hun tha tak an hmang a ni. Dr. N. Albert Khizho, Registrar i/c, MZU chuan lawmthu sawiin he hun a khar a ni. Vawiin hun hmannaah hian Chandigarh atangin Ashtalakshmi Darshan Team leh Goa atangin Yuva Sangam Team te bakah MZU zirlaite an tel a, Union DoNER Minister hi DoNER Secretary Pu Katikithala Srinivas, North Eastern Council (NEC) Secretary Pu Satinder Kumar Bhalla leh DoNER Jt. Secy Niraj Kumar ten an tawiawm a ni.