2633/2026-2027

Aizawl, dated 12th October 2026 : Vawiin khan Union Minister for Development of North Eastern Region (DoNER) Pu Jyotiraditya M. Scindia chuan Tuivamit Tlangah Aizawl Institute of Arts & Music for the North Eastern Region (NER) a hawng a, online-in Ministry of DoNER hnuaia phal leh duan project pakua (9) lung a phun bawk a ni. He hunah hian Chief Minister Pu Lalduhoma, PWD Minister Pu Vanlalhlana, Art & Culture Minister Pu C. Lalsawivunga leh Adviser to Chief Minister (Planning) Pu TBC Lalvenchhunga te an tel a ni.

Union Minister Pu Jyotiraditya M. Scindia chuan thu sawiin kum hnih leh a chanve chhunga North East India a kal vawi sawmthum pangana a ni tawh a, he lai hmun hi India hmasawnna atana hmun pawimawh tak, Vikshit Bharat 2047 atana chanvo pawimawh tak nei a ni tih a sawi a. India chuan Chandrayaan - 3 hmangin thla (moon) ah khian motor dah thei a ni mai bakah kan Tricolour Flag kan phun a, ram zawng zawnga ti thei hmasa ber kan ni a, integrated 4G telecom stack siam chhuak thei ram pangana kan ni bawk tih a sawi a. Heng hlawhtlinna hian kan thlen ngai loh kan thleng chho zel a ni tih a tihlan thu a sawi a, chumi hmasawn zelnaah chuan India hian North East states te hi a mamawh em em a, North Eastern Region a pum hian tangkaina a la nei hle dawn a ni tih a sawi. Mizoram chu a hmun a mawi mai bakah vawiina a mit ngeia a hmuh rimawi tum te an lo thiam em em a ni, a ti a, an chungah lawmthu a sawi a. He culture mawi tak leh hlu tak hi vawn him a ngai tih a sawi a, chutih rual chuan hmasawnna kawngah hian ke pen zel a tul thu a sawi a. DoNER hnuaiah Mizoramah hian project 375 vel a kal mek a, 75% chu zawh tawh a ni a, an hnathawh pawh a tha hle a ni tih a sawi. Chutah chuan Mizo mipuite hian heng hmasawnna kawng hrang hrang inhawng thar te hi hmang tangkaia Mizoram tihhmingthat nan hmang turin hotute a chah a ni.

Chief Minister Pu Lalduhoma chuan thu sawiin Union Minister Pu Scindia hnathawh that vanga Mizoram leh North East India-in hmasawnna tam tak a hmuh tak avangin lawmthu a hrilh a, vawiina project hrang hrang lung an phun pawh hian mipui tana hmasawnna leh malsawmna a thlen ngei a rin thu a sawi bawk a ni.

He hunah hian Chief Secretary Pu Khilli Ram Meena chuan inlawmna thu a sawi a, Ministry of DoNER Secretary Pu Katikithala Srinivas chuan thu a sawi bawk. Zo Tumrik leh Sound from the Hills band te chuan rimawi an tum bawk a. Planning & Programme Implementation Commissioner Pu Vanlaldina Fanai chuan lawmthu sawiin hun a khar a ni.

He hunah hian North Eastern Council (NEC) Secretary Pu Satinder Kumar Bhalla, DoNER leh NEC mi pawimawh hrang hrang te, department hrang hrang - PWD, P&E, Art & Culture, Sports & Youths Services, Health & Family Welfare Department leh Planning & Programme Implementation Department hotute an tel bawk a ni.

Union Minister-in a hawn project dang pakua te chu - Improvement & Upgradation of Daido Vangkawt Road (NESIDS - Roads), Construction of 132 kV S/C line on D/C Tower from Bairabi to West Phaileng via Mamit with Associated Bays (NEC), Augmentation of North Vanlaiphai Water Supply Scheme (NESIDS - OTRI), Construction of AYUSH Development Centre at MINECO (NESIDS - OTRI), Construction of Pukzing to Silsuri Road (NESIDS - Roads), Construction Tualpui to Champhai Road (NESIDS - Roads), Upgradation of Oil Palm Link Road at Kolasib, Mamit, Lunglei and Lawngtlai Districts (NESIDS - Roads), New Construction of 40 Bedded Hostel Building for ANM School, Zemabawk (NESIDS - OTRI), Sports Infrastructure Development within Mizoram (NESIDS - OTRI) te an ni.