Union Finance Minister Pranab Mukherjee hovin North East Chief Minister ten vawiin khan New Delhi-ah sum harsatna leh mamawh chungchangah meeting an nei.

Meeting-ah hian Chief Minister Pu Lal Thanhawla chuan State dang Chief Minister te rualin Mizoramin sum lama harsatna a neih te leh mamawh a neihte a sawichhuak a. Mizoramin sum harsatna a tawh mekte hi Finance Commission thar apiangin harsatna dik tak kan thlen thin te a haider luih zel thin vang a ni a ti a. Hei hian Non Plan Sector ah harsatna nasa tak min siam a ni a ti. Central sorkara sum kan dil belh thin te hi ngaihsak a hlawh lo thin hle a. Hei hi Planning Commission in hriain, kan harsatna phuhrukna turin keini special category state ho tan financial package ruahmanna a siam a. Hei hi central sorkarin min tih puitlin sak thuai turin ka ngen a ni a ti.

Chief Minister hian thil man sang chho zel chungchangte, lehkhathiam hna hmulo chungchangte, sorkar hmasa atanga leiba tam tak a rochun thute, administration atan ringawt a sum hman te, sum hnar tha kan la neih loh thute leh sum hmanna leh mamawhna tam tak kan neihte a sawilang bawk a ni.

Union Finance Minister hian Mizoram sum harsatna chu a hriatpui thu leh a sutkian nan hmalak a tum thu Chief Minister hi a hrilh a a ni.

Meeting ah hian Planning Commission Vice Chairman Pu Montek Singh Ahluwalia leh Planning Commission member (North East) pawh an tel a. Chief Minister Pu Lal Thanhawla hi Chief Secretary, Finance Secretary leh Principal Adviser(Planning) ten an tawiawm a.

He meeting ah hian Tripura State aiawha an Finance Minister tih loh, Hmarchhak State Chief Minister zawng zawng an tel kim vek a ni.