Vawiin ni 18th Dec, 2019 hian Pi Nirmala Sitharaman, Union Minister of Finance hoin NDMC Convention Center, New Delhi ah Pre-Budget Meeting with Finance Ministers of All States and Union Territories (with legislatures) neih a ni a, Pu Anurag Thakur, Union Minister of State for Finance pawh he meeting ah hian telin Mizoram atangin Pu Lalchamliana, Minister a tel a, Pu Vanlalchhuanga IA&AS, Commissioner & Secretary, Finance, Taxation department in a tawiawm a ni.

Pi Nirmala Sitharaman chuan State tin te budget thui tak a hril avanga Union budget pawimawhna hrang hrang a sawi a. 14th Finance Commission hun a lo tawp dawn ta a, 15th Finance Commission kan lo luh dawn avangin thlir tur leh ngaih pawimawh tur tam tak a awm a, State te hnena Tax devolution pawh 13th Finance Commission-a 32% atang khan 14th Finance Commission-ah chuan 42% ah a pung chho a. 15th Finance Commission kan luh dawn hian Centrally Sponsored Schemes te, Tax devolution te, Union atanga State a sum pek dan (Cash flow) te pawh uluk taka ruahman a tul ang, a ti a. State tin te pawhin budget kan buatsaih laiin duh leh tha tih kan ngah thin a, a taka kan pawisa hman nen a inmil lo deuh te a awm fo thin tih sawiin budget kan lo buatsaih tawhah te sum hmanna pawimawh zual te thlir nawna zir chian fo a tul a ni, a ti a. Central in State a sum a pek hman tangkai leh hman dik hi State te mawh a ni tih a sawi bawk a ni.

Meeting hi Ministry of Finance, Govt. of India huaihawt niin Pu Rajiv Kumar, Finance Secretary, Govt. of India in a kaihruai a. State/Union Territory hrang hrang ten an mamawh leh an ngaih pawimawh te sawihona hun an hmang a, Dr. Ajay Bushan Pandey, Secretary (Expenditure), Govt. of India in lawmthu sawiin meeting hi a khar a ni.

Pu Lalchamliana hian thil pathum han thlen bik a nei a -
Mizoram leh North East State te tana Non-Lapsable Central Pool of Resources (NLCPR) Scheme a tangkai zia sawiin, fund erawh tih hniam a ni ta hian harsatna a thlen nasa hle a. Project tam tak kal lai fund pek chhunzawm turin a rawt a. Tuna Scheme thar North East Special Infrastructures Development Scheme (NESIDS) in State te mamawh a phuhruk zawh loh viau avangin tun hmaa NCLPR a fund pek ang zah tal NESIDS hnuaiah pek nise a ti.Tlang ramah phai ram aiin hnathawh a harsain a man a sang em em bik a, tlang ram ho tan bik rate item leh hnathawh zawh hun chhung bitukah kal dan phung (norms) hran neih hial a tul tih a sawi lang a.Externally Aided Project tih dawna a kalkawng thui lutuk leh hun sen tam lutuk sawi chhuakin, clearance pek chungchang pawh Sorkar laipui hnuaiah Steering Committee neia kalphung tha zawk siam (streamline) a tul thu a sawi bawk a ni.