Tourism Department buatsaihih vawiin kha A.R. Ground, Aizawl-ah Winter Festival buatsaih niin Deputy Chief Minister Pu Tawnluia’n khuallian niin a hmanpui a, Tourism Minister Pu Robert Rpmawia Royte chu khualzahawm a ni.

Winter festival hawnna inkhawm buatsaih ah thusawiin khuallian Pu Tawnluia chuan rem hre taka kan sakhuana nen inmil si a kut hman dan ruahman a ni chu a lawmawm a ni a ti a. Mizoram chu khualzin tam zawkin an tlawh theih turin sawrkarin hma a la a, mipuite pawhin pawn lam atanga Mizoram rawn tlawh khualzinte tha taka lo dawngsawng thin tura kan rilru leh nunphungte pawh kan inbuatsaih ve a pawimawh a ni a ti a. Sawrkarin thalaite hmasawnna tur ngaihpawimawhin kawng hrang hrangin hma a la a, policy mumal tak neiin ruahmanna a siam chho mek zel a ni tiin thalaite tan eizawnna tha leh rintlak siam turin theihtawp chhuah mek a nih thu a sawi a ni.

Khualzahawm Pu Robert Romawia Royte pawhin Winter Festival chu Christmas lam hawia mipuite thinlung buatsaihna atana neih a nih thu leh kan hma lawka Lal Isua piancham lo thleng tur kan lawmna turah hnam dang leh ram dang mite hip leh hman ve chakawm khawpa hun hman tul a tih thu a sawi a. Kumin hi Winter Festival hman vawikhatna a ni a, kum dangah pawh uar tak leh inbuatsaihna tha zawk nena hman tum a nih thusawiin, Winter Festival hmangtu leh Mizo mipuite Christmas leh Kumthar hlim taka hmang turin duhsakna a hlan a ni.

Winter Festival hawnna inkhawm ah hian Mizoram Chief Secretary Pu Lalnunmawia Chuaungo-in inlawmna thu a sawi a, Winter Festival-ah hian Food Stalls 12, Handloom & Handicraft Stalls 3, Carnival Stalls 18 leh Photo Booth 2 a awm a ni.